ការប្រកួតប្រជែងរដូវកាល ២០២១/២២ នៅទូទាំងលីគកំពូលទាំង ៥ ប្រចាំតំបន់អឺរ៉ុប បានបញ្ចប់ទៅកាលពីចុងសប្តាហ៍មុន ហើយយើងក៏បានដឹងរួចរាល់ហើយដែរ នូវក្លឹបដែលបានក្លាយជាម្ចាស់ជើងឯក។
ជាការសង្ខេប ដើម្បីចែករំលែកទៅកាន់អ្នកគាំទ្រ ទំព័រ CTS Sports សូមធ្វើការច្បិចលើកមកបង្ហាញនូវស្ថិតិគួរឲ្យចាប់អារម្មណ៍នៃក្លឹបម្ចាស់ជើងឯកទាំង ៥៖
៥) ក្លឹប PSG ក្របខ័ណ្ឌ Ligue 1
PSG បានបញ្ចប់រដូវកាល ដោយយកឈ្នះ ៥ ពិន្ទុទៅលើក្លឹបលេខពីរ Marseille ហើយសម្រេចក្លាយជាម្ចាស់ជើងឯក Ligue 1 លើកទី ១០ ក្នុងប្រវត្តិសាស្ត្ររបស់ពួកគេ។ តែយ៉ាងណាសម្រាប់អ្នកចាត់ការ លោក Mauricio Pochettino សារនេះ គឺជាពានលីគកំពូលបារាំងលើកទី ១ ក្នុងអាជីព។
ប្រកួតបន្ទាប់របស់ក្លឹបសេដ្ឋីបារាំង គឺនាថ្ងៃទី ៣១ កក្កដា នៅឯពានរង្វាន់ Trophee des Champions ជាការតតាំងរវាង PSG ទល់ Nantes ដែលជាយុទ្ធនាការបន្តរដូវកាលថ្មី របស់តារាឆ្នើម Kylian Mbappe។
៤) ក្លឹប AC Milan ក្របខ័ណ្ឌ Serie A
ដឹកនាំក្លឹបជាង ២០ ឆ្នាំហើយ ហែលកាត់បទពិសោធន៍ជាមួយក្លឹបចាស់ថ្មី មិនក្រោម ៥ ឡើយ តែភាគច្រើននៅអ៊ីតាលី។ យ៉ាងណាលោក Pioli បានស្គាល់រសជាតិលើកពានរង្វាន់ជាលើកដំបូង កាលពីពេលថ្មីៗ នៅឯក្របខ័ណ្ឌ Serie A ជាមួយក្លឹប AC Milan។
ប្រជែងជាមួយក្លឹបរួមទីក្រុង ហើយបានយកឈ្នះ ២ ពិន្ទុ សម្រេចលើកពាននៅជុំចុងក្រោយ។ ដោយឡែកសម្រាប់ក្លឹប AC Milan នេះគឺជាពានលីគកំពូល លើកទី ១៩ ក្រោយខកខានលើកតាំងពី ១១ ឆ្នាំមុន។
៣) ក្លឹប Bayern Munich ក្របខ័ណ្ឌ Bundesliga
នៅតែបន្តធ្វើបានល្អ Bayern រដូវកាលកន្លងទៅនេះ បានលើកពាន ដោយនាំមុខ ៨ ពិន្ទុទៅលើ Borussia Dortmund។ នេះជាពាន Bundesliga លើកទី ៣២ តែវាជាលើកដំបូងក្នុងប្រវត្តិសាស្ត្រ ដែលមានអ្នកចាត់ការវ័យក្មេងបង្អស់ ពោលគឺលោក Julian Nagelsmann មានវ័យទើបតែ ៣៤ ឆ្នាំ អាចដឹកនាំឲ្យក្លឹបឈ្នះពានរង្វាន់។
២) ក្លឹប Real Madrid ក្របខ័ណ្ឌ La Liga
រដូវកាលមុន អធិរាជស អត់បានលើកពានរង្វាន់សូម្បីតែមួយ ដល់ងាកមករដូវកាលកន្លងទៅនេះ Real បានឈ្នះពាន La Liga នាំមុខដាច់ ១៣ ពិន្ទុធៀបនឹង Barcelona។ អ្វីដែលគួរឲ្យសាទរខ្លាំងបំផុត គឺសម្រាប់អ្នកចាត់ការលោក Carlo Ancelotti ដែលបានក្លាយជាគ្រូបង្វឹកដំបូងបង្អស់ អាចឈ្នះពានទូទាំងលីគកំពូលទាំង ៥។ តួយ៉ាង គឺ Ligue 1 ជាមួយ PSG, Premier League ជាមួយ Chelsea, La Liga ជាមួយ Real Madrid, Bundesliga ជាមួយ Bayern Munich និង Serie A ជាមួយ AC Milan។
១) ក្លឹប Man City ក្របខ័ណ្ឌ Premier League
ប្រជែងដល់ថ្ងៃចុងក្រោយបញ្ចប់រដូវកាល City នាំមុខតែ ១ ពិន្ទុគត់ លើ Liverpool សម្រេចក្លាយជាម្ចាស់ពានលីគកំពូលអង់គ្លេស លើកទី ៨ ក្នុងប្រវត្តិសាស្ត្រ។ ទន្ទឹមនេះ គឺមាន ៤ ស្ថិតក្រោមការដឹកនាំដោយលោក Pep Guardiola នៅចន្លោះពេល ៥ ឆ្នាំចុងក្រោយ៕
ប្រភព៖ បរទេស