ខ្សែប្រយុទ្ធ Karim Benzema បានអះអាងថាខ្លួនមិនបានទៅខឹងកីឡាករ Kylian Mbappe ដែលសម្រេចចិត្តមិនមកចូលរួមជាមួយក្រុម Real Madrid ឡើយ។
Benzema មិនលាក់បាំងឡើយថារូបគេពិតជាចង់ឱ្យ Mbappe មកចូលរួមជាមួយក្រុម Real Madrid ពិតមែននៅរដូវកាលក្រោយ។ តែការសម្រេចចិត្តរបស់សាមីខ្លួនមិនព្រមមក ហើយបន្ដកុងត្រាជាមួយក្រុម PSG ទៀតនោះ គឺជារឿងរបស់គេ ហើយក៏ត្រូវគោរពដល់ការសម្រេចចិត្តនោះដែរ។ ខ្សែប្រយុទ្ធវ័យ៣៤ឆ្នាំរបស់ជម្រើសជាតិបារាំង បន្ថែមថាខ្លួនក៏មិនទៅខឹងអីជាមួយ Mbappe ដែរ។ ផ្ទុយទៅវិញមានតែជូនពរឱ្យគេជោគជ័យសម្រាប់រដូវកាលខាងមុខទៀត។
Benzema បាននិយាយថា៖ “ខ្ញុំមិនឈឺចាប់អ្វីឡើយសម្រាប់រឿងនេះ។ វានៅមានពេលវែងឆ្ងាយសម្រាប់គេក្នុងការសម្រេចចិត្តពីអនាគតបន្ដទៀត។ វាជាជម្រើសរបស់គាត់។ ខ្ញុំជូនពរគាត់ឱ្យជោគជ័យ តែដូចខ្ញុំនិយាយពីមុនអីចឹង ខ្ញុំចង់ឃើញគាត់លេងឱ្យក្រុម Real Madrid ”។
សូមបញ្ជាក់ថា Mbappe ដំបូងឡើយថាមកលេងនៅ Real Madrid ហើយ ព្រោះរូបគេអស់កុងត្រានៅPSG ប៉ុន្តែបន្ទាប់ពីមានការចរចាកុងត្រាជាច្រើនលើកមក រូបគេក៏សម្រេចចិត្តបន្ដនៅបារីសទៀត ជាមួយការទទួលបានតម្លៃពលកម្មខ្ពស់ដល់ ៦៥០ ០០០ផោនក្នុង១សប្ដាហ៍ឯណោះ លើកុងត្រា៣ឆ្នាំ៕ ប្រភព ៖ goal