សំណាងល្អ ជួនពេលបរាជ័យ Man Utd ទល់ Crystal Palace ងាកទៅ West Ham ឯណោះ ក៏បានលេងចាញ់ Brighton កុំអីបិសាចក្រហម ត្រូវធ្លាក់ទៅលេងនៅ Europa Conference League ហើយសម្រាប់រដូវកាលក្រោយ។ ឥឡូវបានកៅអី Europa ជាមួយនឹង Arsenal ដែរ សម្រាប់រដូវកាល ២០២២/២៣។
ក្រោយចប់ការប្រកួតយប់មិញ កីឡាករដែលឆ្លងកាត់ការលះបង់ដ៏ធំធេងសម្រាប់ក្រុម គឺអ្នកចាំទី David de Gea ក៏បានផ្ញើសារ បង្ហាញការយល់ឃើញមួយចំនួន ក៏ដូចជានិយាយដល់កីឡាករដែលមិនរីករាយជាមួយក្លឹបម្ចាស់ដី Old Trafford។
កីឡាករអេស្ប៉ាញ និយាយ៖ “ខ្ញុំពិតជាចាប់អារម្មណ៍នឹងរដូវកាលបន្ទាប់ ជាមួយអ្នកចាត់ការថ្មី កីឡាករថ្មី ហើយសង្ឃឹមយើងអាចពង្រឹងល្អជាងនេះ ដើម្បីបានចំណាត់ថ្នាក់ល្អជាងនេះ យើងជឿជាក់លើអនាគតខាងមុខ ដោយសង្ឃឹមក្លឹបអាចនាំយកកីឡាករល្អមកចូលរួម ជាមួយនឹងអត្តចរិតដ៏ល្អផងដែរ”។
លោកសង្កត់ធ្ងន់៖ “នរណាចង់នៅ គឺត្រូវបន្តនៅ តែនរណាដែលមិនរីករាយ មិនពេញចិត្តនឹងក្លឹប ពួកគេអាចចាកចេញបាន មិនចាំបាច់បន្តនៅទីនេះទៀតទេ”។ ន័យនេះ មិនច្បាស់ថា សំដៅទៅកីឡាករណាខ្លះឡើយ ព្រោះជាបញ្ហាផ្ទៃក្នុង ដែលមិនអាចទម្លាយជាសាធារណៈ។ ជុំវិញការចាកចេញ លោក Ralf Rangnick បានបង្ហើបច្បាស់ ថា Edison Cavani ជាមួយក្នុងចំណោមកីឡាករឯទៀត ដែលសម្រេចចែកផ្លូវ នៅក្រោយបញ្ចប់រដូវកាល៕
ប្រភព៖ Sportsmole