នៅថ្ងៃអាទិត្យ យប់ស្អែកនេះ នឹងមានការសម្រេចនៅលទ្ធផលក្លឹបត្រូវឈ្នះជើងឯក Premier League ដោយអាចជារវាង Liverpool ឬក៏ Manchester City។ ជួនពេលដែលមេឃខៀវ កំណត់ជួប Aston Villa ក៏នៅម៉ោងតែមួយដែលហង្សក្រហម ត្រូវប៉ះ Wolves ដូចគ្នា។
ភាគច្រើនដែលក្រុមដឹកនាំដោយលោក Pep Guardiola នឹងអាចក្លាយជាម្ចាស់ពាន PL រដូវកាលនេះ។ យ៉ាងណាឆ្លងកាត់បទពិសោធន៍ធ្លាប់លើកពាន UCL កាលនៅក្លឹបចាស់ Barcelona ពីរសារហើយ គ្រូសញ្ជាតិអេស្ប៉ាញ ក៏និយាយថា៖ “ខ្ញុំហ៊ានថាការប្រជែងពាន PL វាលំបាកជាង ព្រោះអីមានការប្រកួតច្រើនសប្តាហ៍ ហើយយើងប្រឈមនឹងបញ្ហាកីឡាកររបួស មានរឿងល្អអាក្រក់កើតឡើង និងទល់ក្រុមគូប្រជែងដ៏តានតឹងច្រើន”។
លោកបន្ត៖ “តែន័យនេះ ក៏ខ្ញុំអត់សំដៅថា ពាន Champions League អត់សំខាន់នោះដែរ ព្រោះយើងចង់ឈ្នះវាខ្លាំងណាស់”។ រំឭកឲ្យដឹងបន្តិច City មិនធ្លាប់បានឈ្នះពានអឺរ៉ុបនៅឡើយទេ ដោយឡើងបានត្រឹមវគ្គផ្តាច់ព្រ័ត្រកាលពីឆ្នាំទៅ ហើយចាញ់ក្រោមថ្វីជើងក្លឹបរួមលីគ Chelsea៕
ប្រភព៖ BeSoccer