អ្នកចាត់ការលោក Jurgen Klopp បាននិយាយថា ក្លឹប Liverpool ទាំងមូល មិនថាតែកីឡាករនិងថ្នាក់លើក្លឹបបានផ្ញើសារទៅកាន់លោក Steven Gerrard ជាអ្នកចាត់ការនៃក្លឹប Aston Villa មុនការប្រកួតទល់ Manchester City នាជុំទី ៣៨។ ក៏ដោយសារលទ្ធផលនៅជុំបន្ទាប់ ពិតជាសំខាន់ បើមេឃខៀវចាញ់ Villa ហើយជួនពេលហង្សយកឈ្នះ Wolves នោះក្រុមលោក Jurgen Klopp នឹងអាចក្លាយជាម្ចាស់ពាន។
គ្រប់គ្នានៅ Liverpool ពិតជាចង់ឃើញ Gerrard អាចរិះរកនូវវិធីដើម្បីយកឈ្នះទៅលើ Man City ឲ្យបាន នៅយប់ស្អែក។ រំឭកបន្តិច អតីតខ្សែបម្រើសញ្ជាតិអង់គ្លេស បានឈរជើងឲ្យហង្សតាំងពីឆ្នាំ ១៩៩៨ ដល់ ២០១៥ នេះបើបូកទាំងពេលវេលាកាលនៅថ្នាល គឺចូលជាង ២០ ឆ្នាំ ឯណោះ។
លោក Klopp បញ្ជាក់៖ “Steven Gerrard គេនឹងចាត់ចែងរឿងនោះឲ្យបាន ១០០ ភាគរយ ខ្ញុំច្បាស់ ដោយមិនចាំបាច់ខ្ញុំទាក់ទងទៅគេទេ ដោយក្លឹបទាំងមូលបានទាក់ទងទៅ Gerrard លើកលែងតែខ្ញុំម្នាក់ គឺអត់”។
លោកបន្ត៖ “ប្រកួត City-Villa បែបណា យើងអត់និយាយទេ ព្រោះបើនិយាយបែបហ្នឹង ដូចអត់គោរពដល់គូប្រជែង Wolves ដែលយើងត្រូវតតាំង ព្រោះអីពួកគេមិនមែនមកលេងដើម្បីចូលរួមជួយអបអរយើងឲ្យឈ្នះពានឡើយ អ៊ីចឹងគ្រប់យ៉ាងគឺសំខាន់លើយើង ក្រុមរបស់យើងត្រូវតែត្រៀមខ្លួនឲ្យបានរួចរាល់”៕
ប្រភព៖ Metro