អ្នកចាត់ការបណ្ដោះអាសន្នលោក Ralf Rangnick នឹងកំណត់ដឹកនាំប្រកួតចុងក្រោយ ទល់ Crystal Palace នៅយប់ថ្ងៃអាទិត្យនេះ ហើយពេលវេលាបន្តទៅមុខ នឹងជំនួសដោយគ្រូពេញសិទ្ធ លោក Erik ten Hag។ ឆ្លងកាត់ពេលវេលាដឹកនាំតាំងពីខែវិច្ឆិកា បុរសសញ្ជាតិអាល្លឺម៉ង់ ថា United នៅតែមិនទាន់សហការគ្នាបានល្អ ឬការលេងដោយសាមគ្គីភាព។
United មិនទាន់ប្រាកដទេ ថានឹងបានលេង Europa League ឬក៏ Europa Conference League តែកៅអីនៅ UCL គឺសម្រេចច្បាស់ហើយថាមិនមានឱកាស។ លើកចុងក្រោយពួកគេតតាំងនៅពានអឺរ៉ុប គឺធ្លាក់ក្រោមថ្វីជើង Atletico Madrid នាវគ្គ ១៦ ក្រុមរដូវកាលនេះ ២-១។
លោក Rangnick បញ្ជាក់៖ “ចាប់តាំងពីបរាជ័យទល់ Atletico យើងអត់ទាន់រកឃើញដំណោះស្រាយនោះទេ ដោយមុនពេលហ្នឹងក្រុមយើងហាក់មានភាពនឹងន មានប្រព័ន្ធការពាររឹងមាំជាងនេះ តែក្រោយមកគឺធ្លាក់ចុះ ទាំងជំនឿទុកចិត្តនិងថាមពលក្រុម”។
លោកបន្ថែម៖ “វាទាមទារឲ្យមានទំនុកចិត្ត មានស្មារតីក្រុមជារួម ហ្នឹងហើយជាចំណុចខកចិត្តធំបំផុត ព្រោះក្រុមរបស់យើង មិនទាន់រកឃើញស្មារតីក្រុមជារួមនៅឡើយ តែត្រង់ចំណុចគុណភាពកីឡាករ ខ្ញុំមានការជឿជាក់ ថាយើងពិតជាមានកីឡាករស្ថិតនៅកម្រិតកំពូលច្រើន”៕
ប្រភព៖ SportBible