ក្លឹបអ្នកមានបុណ្យ Barcelona បើទោះបីនៅពេលចុងក្រោយស្ថិតក្នុងភាពខ្វះខាត តែងាកទៅមើលចចាមអារ៉ាមជុំវិញការនាំចូលកីឡាករ គឺរមែងមានការផ្សារភ្ជាប់ឈ្មោះក្លឹបនៅតំបន់កាតាឡូញ៉ាមួយនេះជានិច្ច។ ដូចករណី Robert Lewandowski គឺមានភាគរយច្រើន ដែលអ្នកមានបុណ្យ នឹងអាចយកបាន ជួនពេលដែលកីឡាករក៏ទើបតែប្រកាសអំពីគម្រោងចង់ចែកផ្លូវពី Bayern Munich។
កន្លងទៅ ខ្សែប្រយុទ្ធប៉ូឡូញ បានបញ្ជាក់ច្បាស់ថា ខ្លួននឹងមិនទម្លាក់ចុងប៊ិចបន្តកុងត្រាថ្មីតទៅទៀតទេ ហើយគិតចង់ចាកចេញ ផ្លាស់ទៅក្លឹបថ្មី នៅទីផ្សារដោះដូរខាងមុខ ដ្បិតបើសុពលភាពកុងត្រាសេសសល់រយៈពេល ១២ ខែទៀត។ ជាមួយគ្នានេះ ខាងភាគីក្លឹបអាណាព្យាបាលក៏មិនព្យាយាមឃាត់ឃាំងខ្ញីចាស់វ័យ ៣៣ ឆ្នាំខាងលើដែរ ពោលឲ្យតែរកបានអ្នកមកជំនួសដោយសក្តិសម។
ងាកទៅក្លឹប Barcelona ដែលចង់បាន Lewandowski ក៏បានរិះរកអស់គ្រប់វិធី ហើយមធ្យោបាយចុងក្រោយបានដាក់សំណើទៅកាន់ក្លឹប Bayern Munich ដោយសុំដោះដូរកីឡាករជាថ្នូរ ព្រោះអីនិយាយពីលទ្ធភាពក្នុងការចំណាយរបស់ក្លឹប គឺអាចនៅមានកម្រិត។
តាមសារព័ត៌មាន Mundo Deportivo ចុះផ្សាយថា ក្លឹបដឹកនាំដោយលោក Xavi Hernandez បើឲ្យចាយលុយ គឺមានតែ ៣៥ លានអឺរ៉ូប៉ុណ្ណោះ ក្នុងការចូលទៅចែចូវយក Lewandowski មកទឹកដី Camp Nou។ ទំហំនេះ វាប្រាកដមិនអាចទៅរួចឡើយ ព្រោះអីហាងឆេងថ្លៃខ្លួន ខ្សែប្រយុទ្ធឡើងជើងរូបនេះ ថ្លៃល្បាក់ ៥០ ទៅ ៦០ លានអឺរ៉ូ។
ជំនួសមកវិញ សំណើចុងក្រោយ Barca ក៏សុំញាត់ឈ្មោះ Memphis Depay ដើម្បីដោះដូរស្មើ ប្តូរយក Lewandowski មកកាន់ក្លឹបរបស់ខ្លួន។ ស្ថិតនៅវ័យ ២៨ ឆ្នាំ កីឡាករហូឡង់ ក៏សេសសល់កុងត្រារយៈពេលមួយឆ្នាំដូចជាកីឡាករប៉ូឡូញដែរ គ្រាន់ថា គុណផលនៃការបញ្ចប់ទី គឺខុសគ្នាដាច់ឆ្ងាយ។ ជាក់ស្តែង Depay រកបានតែ ១៣ គ្រាប់និង Assist ២ លើកប៉ុណ្ណោះ ធៀបនឹង Lewandowski រកបានដល់ ៥០ គ្រាប់ និង Assist ៧ លើក នៅរដូវកាល ២០២១/២២។
ជុំវិញរឿងរ៉ាវដោះដូរកីឡាករនេះដែរ ងាកទៅក្របខ័ណ្ឌអ៊ីតាលី Serie A ក៏កើតមានចចាមអារ៉ាមគួរឲ្យចាប់អារម្មណ៍ ជុំវិញក្លឹប Juventus ដែលបន្ថែមភាគរយលើការនាំយក Paul Pogba ចេញពី Man Utd។ តាមរយៈសំណើចុងក្រោយ បើតាមសារព័ត៌មាន Goal ខាងក្លឹបសេះបង្កង់ បានសន្យានឹងផ្តល់កុងត្រា ៣ ឆ្នាំដល់កីឡាករបារាំង ជាមួយនឹងប្រាក់ពលកម្ម ៦,៣ លានផោន ឬ ៧,៥ លានអឺរ៉ូ/ឆ្នាំបូកនឹងប្រាក់ឧបត្ថម្ភមួយចំនួនផ្សេងទៀត។
ទំហំនេះ ក៏មិនទាន់ច្បាស់ថា ខ្សែបម្រើខាងលើ នឹងយល់ព្រមឬអត់ដែរ ដ្បិតអីសព្វថ្ងៃនៅ Man Utd គេអាចរកបានដល់ ៩,៣ លានផោនឯណោះ គ្រាន់ថាពេលវេលាឈរជើង ក៏បានឈានមកដល់ទីបញ្ចប់នៅចុងខែមិថុនា។ យ៉ាងណាក្រៅតែពី Juventus ក៏ទំនងមានក្លឹប Barcelona, Real Madrid និង PSG ជាដើម ដែលនឹងប្រជែងលើការចរចា ព្រោះវាជាឱកាសល្អ ជួនពេល Pogba ឈរឈ្មោះក្លាយជា Free Agent លើទីផ្សារដោះដូរ៕
ប្រភព៖ បរទេស