ការប្រកួតប្រជែងនៅក្របខ័ណ្ឌកំពូលអង់គ្លេស Premier League កៀកនឹងបញ្ចប់ជាផ្លូវការហើយ ពោលជំនួបសេសសល់របស់ក្រុមទាំងអស់ នឹងសម្រេចត្រូវយកលទ្ធផលនៅចុងសប្តាហ៍ ថ្ងៃទី ២២ ឧសភា។ នេះក៏នឹងមានការប្រកួតមមាញឹកខ្លាំង ចាប់ពីពាក់កណ្ដាលសប្ដាហ៍តទៅ សម្រាប់ក្រុមដែលទើបឈានដល់ជុំទី ៣៦ ដែល CTS Sports នឹងកំដរអារម្មណ៍បងប្អូនអ្នកទស្សនាដល់ជុំបញ្ចប់។
មានរឿងពីរដែលយើងចង់ដឹងខ្លាំង ដោយ ១) ថាតើ Premier League រដូវកាលនេះ រវាងក្លឹប Man City ឬក៏ Liverpool ដែលនឹងក្លាយជាម្ចាស់ជើងឯក? និងទី ២) តើ Spurs ឬក៏ Arsenal ដែលបានកៅអីលេង UCL ហើយចុះកៅអីនៅ Europa League និង Conference League កំណត់ធ្លាក់ទៅក្រុមណាខ្លះ?
ងាកមកអត្ថបទនេះ CTS Sports សូមលើកយករឿងប្រជែងពាន រវាង Liverpool និង Man City មកនិយាយ ព្រោះក្រោយហង្សឈ្នះ Southampton យប់មិញ ក៏ហាក់មានអ្នកគាំទ្រផ្ទុះការវែកញែកឥតឈប់៖
នៅវេលាម៉ោង ១០:០០ នាទីយប់ ថ្ងៃអាទិត្យទី ២២ ឧសភា ក្នុងម៉ោងតែមួយ Liverpool នឹងត្រូវបើកទ្វារស្វាគមន៍ក្លឹបចចក Wolves ជួនពេលដែល Man City ត្រូវដើរតួជាម្ចាស់ផ្ទះ ស្វាគមន៍ក្លឹបភ្ញៀវ Aston Villa។ គម្លាតពិន្ទុរបស់ក្រុមទាំងពីរ គឺហង្សចាញ់មេឃខៀវ ១ ពិន្ទុ ដូច្នេះប្រកួតចុងក្រោយ ក្រុមដែលមានប្រៀប ដឹកនាំដោយលោក Pep Guardiola ប្រសិនជាអាចយកឈ្នះ Aston Villa នោះ ១០០ ភាគរយ ដោយមិនចាំបាច់ខ្វល់ពីលទ្ធផលរបស់ Liverpool ទល់ Wolves គឺកំណត់បាន City សម្រេចក្លាយជាម្ចាស់ជើងឯក រដូវកាលនេះ។
ផ្ទុយទៅវិញ ប្រសិនណាជា City លេងបានត្រឹមស្មើ ទល់ Villa យក ១ ពិន្ទុនៅជុំទី ៣៨ នោះគឺត្រូវអង្គុយបន់ហើយ ដោយបន់ស្រន់ឲ្យក្រុមដឹកនាំដោយលោក Jurgen Klopp ចាំបាច់ត្រូវតែស្មើ ឬចាញ់ Wolves។ មួយករណីទៀត បើ City លេងចាញ់ Villa ហើយ Liverpool ស្មើ នោះមានន័យថា ក្លឹបទាំងពីរ ទទួលបាន ៩០ ពិន្ទុស្មើ ដូច្នេះក្រុមឈ្នះជើងឯក គឺគេសម្រេច ដោយធៀបគ្រាប់បាល់ចំណេញ ដែលគិតត្រឹមជុំទី ៣៧ City មាន ៧២ គ្រាប់ រីឯ Liverpool មាន ៦៦ គ្រាប់។
ជុំវិញរឿងរ៉ាវខាងលើនេះដែរ ក៏មានបទសម្ភាសន៍គួរឲ្យអស់សំណើច ដែលប្រធានក្រុម Liverpool គឺ Jordan Henderson បាននិយាយបែបលេងសើច ថាខ្លួននឹងទៅពឹងអ្នកចាត់ការលោក Steven Gerrard ឲ្យរិះរកគ្រប់វិធី ដើម្បីទប់យកលទ្ធផលល្អមួយ ពី Man City ដើម្បីអាចបន្ថែមក្តីសង្ឃឹមរុញ Liverpool ឲ្យក្លាយជាម្ចាស់ពាន។
Henderson ធ្លាប់ជាមិត្តរួមក្រុម ជាមួយ Gerrard កាលនៅជាកីឡាករ ហើយបន្ទាប់ពីយកឈ្នះ Southampton យប់មិញ ខ្សែបម្រើសញ្ជាតិអង់គ្លេសនិយាយ៖ “ខ្ញុំប្រហែលនឹងតេទៅរក Steven Gerrard នៅអាទិត្យនេះ ដោយសង្ឃឹមថាគាត់អាចជួយពួកយើងបាន”។ គួររំឭកថា លទ្ធផលកាលពីជើងទី ១ ខាង Aston Villa បានចាញ់ ១-២ ក្នុងដីខ្លួនឯង ទល់ City ស្របពេលដែល Liverpool ក៏បានយកឈ្នះ ១-០ ទៅលើ Wolves។ ចុះលទ្ធផលជើងទី ២ នេះវិញ តើអ្នករាល់គ្នាទស្សន៍ទាយថានឹងបែបណាដែរ?
ប្រភព៖ បរទេស