នៅក្របខ័ណ្ឌកំពូលអង់គ្លេស Premier League គ្រប់គ្នាកំពុងផ្តោតខ្លាំង អំពីក្លឹបដែលនឹងឈ្នះជើងឯក ក្លឹបអាចឈោងបានកៅអី Top 4 និង Top 6 ជាដើម។ លទ្ធផលបែបណា នឹងសម្រេចនៅការប្រកួតជុំទី ៣៨ តែងាកមកអត្ថបទនេះ CTS Sports សូមបង្ហាញអំពីសមិទ្ធផលកីឡាករអាស៊ី ២ រូប ដែលមិនសូវមានអ្នកចាប់អារម្មណ៍៖
១) Takumi Minamino
ដោយសារជាចំណែកលើសរបស់ Liverpool ដូច្នេះហើយអ្នកគាំទ្រជាច្រើនបានមើលរំលង ដ្បិតបើគេបានចូលរួមចំណែកយ៉ាងសំខាន់ក៏ដោយ នៅពានរង្វាន់ EFL និង FA Cup កន្លងមក។ ពាន ២ ដែលហង្ស ទើបលើកថ្មីថ្មោង គួរអរគុណជាពិសេសដល់កីឡាករជប៉ុន Minamino។ នេះបើតាមការលើកឡើងរបស់ អតីតខ្សែការពារជើងចាស់លោក Jose Enrique។
នៅជ័យជម្នះរបស់ហង្សទៅលើតោខៀវ នាវគ្គផ្ដាច់ព្រ័ត្រ FA Cup ថ្ងៃមុន ម្នាក់ៗចាប់អារម្មណ៍តែអ្នកចាំទី Alisson Becker និងអ្នកស៊ុតចុងក្រោយបង្អស់ គឺខ្សែការពារក្រិក Konstantinos Tsimikas តែមុននេះ ពួកគេភ្លេចហើយ ថាបានចំណែកគ្រាប់បាល់ជាច្រើនរបស់ Minamino ទើបរុញឲ្យហង្សអាចឡើងដល់វគ្គចុងក្រោយ។
កីឡាករជប៉ុន រកបាន ៤ គ្រាប់ នៅ ៥ ប្រកួត EFL Cup និង ៣ គ្រាប់ នៅ ៤ ប្រកួត FA Cup ជាប់ឈ្មោះជា Top Scorer ប្រចាំក្លឹប នៅព្រឹត្តិការណ៍ទាំងពីរ តែបែរជាមិនមានឈ្មោះលេងនៅវគ្គផ្ដាច់ព្រ័ត្រទៅវិញ។ លោក Enrique សរសេររៀបរាប់លើ Twitter បែបនេះ៖ “យើងប្រាកដជានឹងមិនអាចឈ្នះពានទាំងពីរបានទេ បើគ្មានវត្តមាន Minamino នេះគេមិនទទួលបានពេលវេលាលេងគ្រប់គ្រាន់ឡើយ តែរាល់ពេលមានឱកាស គេតែងផ្តល់ឲ្យអស់ពីខ្លួន ដូច្នេះវាគួរតែក្លាយជាការសាទរដ៏ធំធេង សម្រាប់បុរសម្នាក់នេះ ទើបសក្តិសម”។
២) Son Heung-min
រវល់តែនិយាយអំពី Liverpool, Man City ហើយម្នាក់ៗក៏ចាប់អារម្មណ៍តែ Mohamed Salah និង Sadio Mane រឿងអាចប្រជែងពាន Ballon d’Or នាឆ្នាំនេះ ទើបនាំឲ្យម្នាក់ៗរំលងពីគុណផលដ៏អស្ចារ្យ ដែលកីឡាករអាស៊ី Son Heung-min បានសម្រេចឲ្យ Spurs។
បើដកគ្រាប់បាល់ប៉េណាល់ទី ម្ចាស់អាវលេខ ៧ Son ទេ ដែលជាអ្នករកបានគ្រាប់បាល់ច្រើនបំផុតនៅ Premier League រដូវកាល ២០២១/២២។ ដល់តែរាប់ជារួម កីឡាករកូរ៉េខាងត្បូងបែរឈរលេខ ២ មាន ២១ គ្រាប់ ចាញ់ ១ គ្រាប់ធៀបនឹងកីឡាករអេហ្សីប។
គ្រប់គ្នាគួរតែមានការសាទរខ្លាំង ដល់កីឡាករអាស៊ី Son ព្រោះអីនេះជារដូវកាលដំបូង ដែលគេរកបានគ្រាប់បាល់ច្រើនបំផុតឲ្យ Spurs ហើយថាមិនត្រូវ ក៏នឹងអាចជួយក្លឹបឈោងបាន Top 4 លេង UCL រដូវកាលក្រោយក៏ថាបាន។ ប្រកួតជុំទី ៣៨ សម្រាប់ Spurs ត្រូវការ ១ ពិន្ទុគត់ពី Norwich City ហើយចំនួនគ្រាប់បាល់ Son នឹងសម្រេចយកឈ្នះចាញ់រវាង Salah ជួនពេលដែល Liverpool ត្រូវលេងប៉ះ Southampton និង Wolves នាប្រកួតសេសសល់៕
ប្រភព៖ បរទេស