ក្លឹប Real Madrid ទើបតែបានសម្រេចក្លាយជាម្ចាស់ជើងឯក ពានរង្វាន់ La Liga កាលពីពេលថ្មីៗនេះ ហើយភារកិច្ចបន្ទាប់ គឺនៅកាត់កងលទ្ធផលរវាងក្លឹបអង់គ្លេស Liverpool នាវគ្គផ្តាច់ព្រ័ត្រ ពានរង្វាន់ UEFA Champions League កំឡុងចុងខែឧសភា។ សមិទ្ធផលជោគជ័យនៃរដូវកាល ២០២១/២២ គឺទទួលបានការចូលរួមពីសំណាក់កីឡាករជើងចាស់ថ្មី ក៏ដូចជាយុទ្ធសាស្រ្តនៃការដឹកនាំដ៏ល្អរបស់អ្នកចាត់ការលោក Carlo Ancelotti។
ឆ្លៀតឱកាសនេះ ក្លឹប Real Madrid ក៏ចង់ផ្តល់កាដូពិសេសជូន គ្រាប់ពេជ្រវ័យក្មេងប្រចាំក្លឹប នោះគឺ Vinicius Junior តាមរយៈការផ្តល់ថ្លៃពលកម្ម ១ គុណជា ៣ ឲ្យតែគេព្រមទម្លាក់ចុងប៊ិចចុះហត្ថលេខាលើការបន្តកុងត្រាថ្មី។ សុពលភាពកុងត្រាសព្វថ្ងៃ កីឡាករប្រេស៊ីលកំណត់ត្រូវឈរជើងឲ្យក្លឹបអធិរាជស ដល់ចុងខែមិថុនា ឆ្នាំ ២០២៤ ជាមួយនឹងហាងឆេងថ្លៃខ្លួន ល្បាក់ ១០០ លានអឺរ៉ូ។
តែបើតាមសារព័ត៌មាន Mundo Deportivo បានចុះផ្សាយ ក្លឹបដឹកនាំដោយប្រធានធំ លោក Florentino Perez ហាក់ចង់ឃើញយុវជនវ័យ ២១ ឆ្នាំ បន្តស្ថិតក្នុងផែនការណ៍យូរអង្វែងតទៅទៀត។ ប្រភពសង្កត់ធ្ងន់ ក្លឹបស្ថិតក្នុងទីក្រុង Madrid ចង់តកុងត្រាថ្មី ឲ្យ Vinicius ដល់ចុងខែមិថុនា ឆ្នាំ ២០២៧ ហើយដំឡើងថ្លៃពលកម្មពីជាង ២,៥ លានផោន មកដល់ ៧,៧ លានផោន ឬ ៩ លានអឺរ៉ូ ក្នុងមួយរដូវកាល។
ទំហំនេះមានន័យថា អតីតកីឡាកររបស់ Flamengo នឹងទទួលបានប្រាក់ពលកម្មល្បាក់ជិត ២០ មុឺនអឺរ៉ូ/សប្តាហ៍ ខ្ពស់ជាងប្រាក់ពលកម្មសព្វថ្ងៃ បានមិនដល់ ៧ មុឺនអឺរ៉ូផង។ ទៅមើលស្ថិតិរដូវកាលនេះ កីឡាករដែលទើបរកបាន Hat-trick គ្រាប៉ះ Levante សរុបធ្វើបាន ២១ គ្រាប់និង Assist ២០ លើក នៅការបង្ហាញខ្លួន ៥០ ប្រកួត។
ស្រដៀងគ្នានេះ ងាកទៅក្លឹបគូប្រជែងរបស់ Madrid គឺ Liverpool ក៏ល្ហិចល្ហៀង ថាកៀកនឹងសម្រេចការផ្តល់ជូនកុងត្រាថ្មី សម្រាប់ខ្សែប្រយុទ្ធឆ្នើម Mohamed Salah។ ជាការពិត បុរសសញ្ជាតិអេហ្សីប សេសសល់សុពលភាពកុងត្រាត្រឹមតែ ១២ ខែទៀតប៉ុណ្ណោះ ហើយពេលចុងក្រោយមានចចាមអារ៉ាមថាក្លឹប Barcelona, PSG និង Real Madrid ជាដើម ព្យាយាមតាមក្រវែលឥតឈប់។
ហេតុនេះ Liverpool ក៏ព្យាយាមរារាំង តាមរយៈការផ្ដល់កុងត្រាថ្មី ឲ្យលឿនបំផុតតាមដែលអាចធ្វើទៅបាន ហើយចង់សម្រេចយ៉ាងយូរ ត្រឹមទីផ្សារដោះដូររដូវក្តៅខាងមុខ។ បើតាមសារព័ត៌មាន Football Insider ចុះផ្សាយថា Liverpool កំពុងសង្ឃឹមខ្ពស់ ថានឹងអាចអូសទាញចិត្ត Salah ឲ្យទម្លាក់ចុងប៊ិចលើកុងត្រាថ្មី ដោយរុញបុរសវ័យ ២៩ ឆ្នាំ ឲ្យក្លាយជាកីឡាករស៊ីថ្លៃបំផុតនៅ Premier League។
នោះគឺជាមួយទំហំប្រាក់ពលកម្មដល់ទៅ ៥០០ ០០០ ផោន/សប្តាហ៍ ច្រើនជាងល្បាក់ ១០ មុឺនផោន ធៀបនឹងប្រាក់ឈ្នួលរបស់ Kevin de Bruyne ក៏ដូចជា Erling Haaland នៃក្លឹបមេឃខៀវ Man City។ គួរឲ្យដឹងថា យប់នេះ Salah ក៏នឹងមានភារកិច្ចត្រូវជួយ Liverpool តតាំងនៅពានរង្វាន់ FA Cup កំណត់ប៉ះ Chelsea នាវេលាម៉ោង ១០:៤៥ នាទីយប់ មានផ្សាយផ្ទាល់លើទំព័រ CTS Sports៕
ប្រភព៖ បរទេស