បន្ទាប់ពីរងការដាក់ទណ្ឌកម្មពីរដ្ឋាភិបាលអង់គ្លេស ទីបំផុតក្លឹបតោខៀវ Chelsea ក៏សម្រេចរកបានម្ចាស់ថ្មី ក្រោយលោក Roman Abramovich ប្រកាសលក់ទៅឲ្យមហាសេដ្ឋីលោក Todd Boehly នៅតម្លៃ ៤,២៥ ពាន់លានផោន។
Boehly ក៏បានរំលេចវត្តមានកាលពីប្រកួតដែល Chelsea លេងស្មើ Wolves ២-២ នៅឯកីឡដ្ឋាន Stamford Bridge ផងដែរ តែយ៉ាងណាជឿថាអ្នកគាំទ្រប្រហែលជាមិនទាន់បានដឹងនោះទេ អំពីរឿងរ៉ាវមួយចំនួនក៏ដូចជាទំហំទ្រព្យសម្បត្តិ របស់អ្នកជំនួញសញ្ជាតិអាមេរិកខាងលើ។ ងាកមកអត្ថបទនេះ CTS Sports ធ្វើការបង្ហាញឲ្យអ្នកគាំទ្របានដឹងនៅទិន្នន័យថ្មី នៃម្ចាស់ក្លឹបមានបំផុតទាំង ៦ ក្នុងលោក ក្រោយការមកដល់របស់ម្ចាស់ថ្មី នៃក្លឹប Chelsea៖
៦) សម្ព័ន្ធ Bohley ម្ចាស់ក្លឹប Chelsea
ការចុះហត្ថលេខាទិញយកក្លឹបការពារតំណែងជើងឯក UCL រដូវកាលចាស់មួយនេះ មិនមែនប្រើប្រាស់តែឈ្មោះសេដ្ឋីអាមេរិកខាងលើមួយរូបទេ ជារួមគឺចងជាសម្ព័ន្ធ ដោយមានលោក Todd Bohley, Mark Walter និង Hansjorg Wyss។ កិច្ចព្រមព្រៀងផ្លាស់ម្ចាស់ថ្មី ទំនងជានឹងបញ្ចប់មុនខែឧសភា ឆ្នាំ ២០២២។ និយាយអំពីទំហំទ្រព្យសម្បត្តិជារួមរបស់សម្ព័ន្ធ Bohley ឬបុគ្គលទាំង ៣ បញ្ចូលគ្នា គឺមានដល់ទៅ ១០,៨៦ ពាន់លានផោន។
៥) Andrea Agnelli ម្ចាស់ក្លឹប Juventus
លោក Agnelli ត្រូវបានតែងតាំងជាប្រធានក្រុមប្រឹក្សាភិបាលនៃក្លឹបសេះបង្កង់ក្នុងឆ្នាំ ២០១០ ហើយក្រៅតែពីជំនួញក្នុងវិស័យបាល់ទាត់ ទៀតសោតក៏ជាសមាជិកធំ នៅឯក្រុមហ៊ុនរថយន្ត Stellantis និងក្រុមហ៊ុនវិនិយោគ Exor។ ទំហំទ្រព្យសម្បត្តិរបស់បុរសវ័យ ៤៦ ឆ្នាំ មានដល់ទៅ ១៤ ពាន់លានផោន។
៤) Dietrich Mateschitz ម្ចាស់ក្លឹប RB Leipzig, RB Salzburg និង New York Red Bulls
ជាបុគ្គលមានបំផុតលំដាប់ទី ៤០ ក្នុងលោក ហើយបើនិយាយក្នុងវិស័យបាល់ទាត់ គឺជាម្ចាស់ក្លឹបមានទ្រព្យសម្បត្តិច្រើនបំផុតលំដាប់ទី ៤ ពោលដល់ទៅ ១៥,៧ ពាន់លានផោន។ ក្នុងចំណែកក្លឹប RB Leipzig របស់អាល្លឺម៉ង់ និង RB Salzburg របស់អូទ្រីស សេដ្ឋីអាមេរិកមានភាគហ៊ុនដល់ទៅ ៤៩ ភាគរយ ហើយក៏បានទិញយកក្លឹប New York Red Bulls នៅឆ្នាំ ២០១៩។
៣) Sheikh Mansour ម្ចាស់ក្លឹប Man City
ក្លឹបមេឃខៀវត្រូវបានស្រោចស្រង់ជាថ្មី បន្ទាប់ពីអ្នកនយោបាយនៃប្រទេសអារ៉ាប់រួម Sheikh Mansour បានទិញយកកាលពីឆ្នាំ ២០០៨។ សេដ្ឋីវ័យ ៥១ ឆ្នាំរូបនេះ ត្រូវបានគេដឹងថាមានកាន់កាប់ជំនួញជាច្រើនក្នុងដៃ ហើយក្តោបទ្រព្យសម្បត្តិរួម ដល់ទៅ ២១ ពាន់លានផោន។
២) Qatar Investment Group ម្ចាស់ក្លឹប PSG
ព្រះអង្គម្ចាស់ Tamim bin Hamad Al Thani បានចំណាយលុយ តាមរយៈ Qatar Sports Investments ទៅទិញយកភាគហ៊ុនដល់ទៅ ៧០ ភាគរយនៃក្លឹបបារាំង Paris Saint-Germain មកកាន់កាប់កាលពីឆ្នាំ ២០១១។ សម្ព័ន្ធយក្សមួយនេះ ត្រូវបានគេដឹងថាមានទ្រព្យសម្បត្តិដល់ទៅ ២២០ ពាន់លានផោន។
១) Saudi Arabia Public Investment Fund ម្ចាស់ក្លឹប Newcastle United
កាលពីខែតុលា ឆ្នាំ ២០១១ ក្លឹប Newcastle United បានសម្រេចលក់ទៅឲ្យម្ចាស់ថ្មី ដែលជាសម្ព័ន្ធយក្សនៅអារ៉ាប៊ីសាអ៊ូឌីត។ គ្រប់គ្នាកំពុងរំពឹងថា ក្លឹបសារិកាព្រៃ នឹងអាចវិវត្តខ្លួនក្លាយទៅជា “Man City ទីពីរ” នៅ Premier League នាប៉ុន្មានឆ្នាំក្រោយ ស្របពេលដែលទ្រព្យសម្បត្តិរបស់សម្ព័ន្ធយក្សខាងលើ មានដល់ទៅ ៣២០ ពាន់លានផោន៕
ប្រភព៖ បរទេស