កៀកនឹងបញ្ចប់រដូវកាល ក៏ស្រាប់តែផ្ទុះព័ត៌មានគួរឲ្យចាប់អារម្មណ៍ពីរ ជុំវិញការផ្លាស់ចេញរបស់កីឡាករ ២ រូប ដែលមានមួយទើបតែបានក្លាយជាដំណឹងផ្លូវការ និងមួយផ្សេងទៀត កៀកនឹងក្លាយជាការពិត ៩៩ ភាគរយ។ ការផ្ទេររបស់ Erling Haaland ទៅកាន់ Manchester City ត្រូវបានក្លឹបប្រកាសរួចរាល់កាលពីម្សិលមិញ ស្របពេលដែលរឿងរ៉ាវ Antonio Rudiger នៅស្ថិតក្រោមការរង់ចាំ ដដែល។
យ៉ាងណាទាក់ទិននឹងតម្លៃពលកម្ម ដែលកំពូលកីឡាករទាំងពីរទទួលបាន គឺយើងបានដឹងរួចរាល់ហើយចេញពីប្រភពសារព័ត៌មានគួរឲ្យទុកចិត្ត។ ជុំវិញការផ្ទេរចូលកីឡាករន័រវេស មកកាន់ក្លឹបម្ចាស់ដី Etihad គឺបានព្រមព្រៀងនៅសុពលភាពកុងត្រារយៈពេល ៥ ឆ្នាំ ពោលដល់ចុងខែមិថុនា ឆ្នាំ ២០២៧។ ការចុះហត្ថលេខាសារនេះ គឺកំណត់ឲ្យភាគីក្លឹប City ត្រូវទូទាត់ប្រាក់ផ្តាច់កុងត្រា ៦០ លានអឺរ៉ូ ឬប្រហែល ៦៤ លានផោន ទៅកាន់ភាគីក្លឹបអាណាព្យាបាល Borussia Dortmund។
បើតាមរបាយការណ៍ពី Fabrizio Romano បានចុះផ្សាយថា សម្រាប់ខ្សែប្រយុទ្ធវ័យ ២១ ឆ្នាំខាងលើ នឹងអាចទទួលបានប្រាក់ពលកម្ម ៣៧៥ ០០០ ផោន/សប្តាហ៍ ពីក្រុមដឹកនាំដោយលោក Pep Guardiola។ ទំហំនេះ រុញឲ្យគេឈរស្មើនឹងកម្រិតរបស់ Kevin de Bruyne ដែលជាកីឡាករស៊ីថ្លៃបំផុតប្រចាំក្លឹប ក៏ដូចជាប្រចាំក្របខ័ណ្ឌ Premier League ទាំងមូល។
៣៧៥ ០០០ ផោន/សប្ដាហ៍ គឺជាទំហំច្រើនជាង Cristiano Ronaldo ព្រោះអីកីឡាករព័រទុយហ្គាល់ កំណត់ត្រូវកាត់ប្រាក់ពលកម្ម ២៥ ភាគរយ ធ្លាក់មកក្រោម ៣០ មុឺនផោន ចាប់ពីរដូវកាល ២០២២/២៣ តទៅ បន្ទាប់ពីក្លឹប Man Utd បាត់បង់ឱកាសលេងពានអឺរ៉ុប UCL រដូវកាលក្រោយ។ គួរបញ្ជាក់ថា ទន្ទឹមនឹងទំហំថ្លៃពលកម្មដ៏ក្រាស់ក្រែល Haaland ក៏មានតម្លៃផ្តាច់កុងត្រា Release Clause ក្នុងកិច្ចព្រមព្រៀង ដូចកាលនៅជាមួយ Dortmund ផងដែរ តែសារនេះ ថ្លៃ ៧៥ លានអឺរ៉ូ។
ងាកទៅខ្សែការពារ Antonio Rudiger ឯណោះវិញ ក្រោយសម្រេចការចាកចេញពី Chelsea នៅលក្ខខណ្ឌឥតតម្លៃខ្លួន ឥឡូវក៏លឺថា រកបានក្លឹបថ្មីរួចរាល់ហើយ នោះគឺជាមួយក្លឹបយក្សអេស្ប៉ាញ Real Madrid។
បើតាមសារព័ត៌មាន The Athletic ចុះផ្សាយថា បុរសវ័យ ២៩ ឆ្នាំ បានចុះហត្ថលេខាលើកុងត្រារយៈពេល ៤ ឆ្នាំ ជាមួយក្លឹបថ្មីក្នុងទីក្រុង Madrid ហើយអាចទទួលបានប្រាក់ពលកម្មប្រហែល ៩-១០ លានអឺរ៉ូ នេះបើនិយាយក្រោយកាត់ពន្ធរួចរាល់ Rudiger អាចកើបលុយបាន ៤០០ ០០០ អឺរ៉ូ ឬ ៣៤២ ០០០ ផោន/សប្តាហ៍ឯណោះ។ ទំហំនេះ វាច្រើនជាងលើស ៥០ ភាគរយ ធៀបនឹងថ្លៃពលកម្មចាស់ កាលនៅក្លឹបម្ចាស់ដី Stamford Bridge។
បញ្ជាក់ឲ្យដឹងថា Rudiger ទំនងជានឹងចាប់បង្ហាញវត្តមានឲ្យក្លឹប Madrid នៅក្រោយការប្រកួតទល់ Liverpool នាវគ្គផ្តាច់ព្រ័ត្រ UCL។ វត្តមានរបស់គេ ទំនងជានឹងទៅបំពេញតំណែងការពារកណ្តាល ដោយចាប់ដៃជាមួយ David Alaba ហើយស្លាបឆ្វេងស្តាំ មាន Ferland Mendy និង Dani Carvajal។ ទៅមើលស្ថិតិរដូវកាលនេះបន្តិច ក្របីព្រៃអាល្លឺម៉ង់ រកបាន ៥ គ្រាប់និង Assist ៤ លើក នៅការបង្ហាញខ្លួន ៥០ ប្រកួតសរុប៕
ប្រភព៖ បរទេស