ក្រុមហ៊ុន Electronic Arts បានប្រកាសអំពីការបញ្ចប់ភាពជាដៃគូរបស់ខ្លួន ជាមួយនឹងសមាគមបាល់ទាត់ពិភពលោក FIFA ពោលនឹងបញ្ចប់ការចេញផ្សាយសេរ៊ីហ្គេមបាល់ទាត់ FIFA ចាប់ពីឆ្នាំ ២០២៣ តទៅ។ អស់រយៈពេល ២៩ ឆ្នាំមកហើយ ដែលកិច្ចសហការរវាងភាគីទាំងពីរបានដំណើរការ រួចបានវិវត្តខ្លួនក្លាយជាហ្គេមបាល់ទាត់ មានឈ្មោះបោះសំឡេងបំផុតក្នុងលោក ចាប់ពីកំណែដំបូងនៅឆ្នាំ ១៩៩៣។
ដូច្នេះមានន័យថា ហ្គេម FIFA 23 ដែលត្រៀមចេញផ្សាយនៅថ្ងៃទី ៣០ កញ្ញា ឆ្នាំ ២០២២ នឹងក្លាយជាសេរ៊ីហ្គេម FIFA ចុងក្រោយបង្អស់របស់ EA Sports។ តែយ៉ាងណាជុំវិញការផ្តាច់ឈ្មោះ ទំនងមិនប៉ះពាល់ធំដុំទេ ដល់ហ្គេមទាំងមូល ព្រោះទាំងអាជ្ញាប័ណ្ណចេញពីក្លឹបនិងក្របខ័ណ្ឌ គឺនៅស្ថិតក្រោមការសហការរវាង EA ដដែល មានន័យថាពាន UEFA Champions League, Europa League និង Conference League ជាដើម នៅបន្តអាចលេងបានជាធម្មតា។
នាយកប្រតិបត្តិរបស់ EA លោក Andrew Wilson បាននិយាយក្នុងសេចក្តីថ្លែងការណ៍បែបនេះ៖ “ចង្ខុវិស័យរបស់យើងសម្រាប់ EA SPORTS FC គឺបង្កើតឥទ្ធិពលដល់ក្លឹបបាល់ទាត់ទូទាំងពិភពលោក និងជាចំណុចកណ្តាលនៃអ្នកគាំទ្របាល់ទាត់ទាំងអស់ ហើយអស់រយៈពេលជិត ៣០ ឆ្នាំមកនេះ យើងបានសាងសហគមន៍ដ៏ធំមួយ មានកីឡាកររាប់លាននាក់ អត្តពលិករាប់ពាន់នាក់ មានលីគ ក្លឹប សហព័ន្ធជាច្រើនរយ ដែលបានក្លាយជាដៃគូរបស់ពួកយើង”៕
ប្រភព៖ Sportsmole