ក្រុមបាល់ទាត់ក្រោមអាយុ ២៣ ឆ្នាំរបស់កម្ពុជា កាលពីជុំទី ១ វគ្គចែកពូល បានបង្កើតលទ្ធផលដ៏អស្ចារ្យ តាមរយៈការយកឈ្នះ ៤-១ ទៅលើក្រុមឡាវ។ ចំណាត់ថ្នាក់បណ្ដោះអាសន្ននៅពូល B ក្រុមគោព្រៃជំទង់ ឈរលេខ ២ មាន ៣ ពិន្ទុ ហើយកំណត់ត្រូវជួបក្រុមសិង្ហបុរី នៅវេលាម៉ោង ០៤:០០ នាទីរសៀល នៅថ្ងៃតែមួយ ដែលម៉ាឡេស៊ី ត្រូវប៉ះឡាវ នាវេលាម៉ោង ០៧:០០ យប់។ ជំនួបគូទាំងពីរ ក៏នឹងមានផ្សាយផ្ទាល់លើទំព័រ CTS Sports ផងដែរ។
ជុំវិញដំណើរការប្រកួត វិញ្ញាសាបាល់ទាត់ផ្នែកបុរស នៅព្រឹត្តិការណ៍ស៊ីហ្គេមលើកទី ៣១ ក៏កើតមានសំណួរពីអ្នកគាំទ្រ បានចោទសួរមកកាន់ពួកយើង ថាតើក្រុមកម្ពុជា ធ្លាប់មានប្រវត្តិឈ្នះមេដាយពីមុនមកទេ? ហើយនិយាយអំពីលទ្ធផលឡើងខ្ពស់បង្អស់ត្រឹមវគ្គណា?
ផ្អែកតាមទិន្នន័យតាំងពីស៊ីហ្គេម ឆ្នាំ ២០០១ គ្រាម៉ាឡេស៊ីធ្វើជាម្ចាស់ផ្ទះ មកទល់ព្រឹត្តិការណ៍កាលពីឆ្នាំ ២០១៩ នៅឯប្រទេសហ្វីលីពីន គឺក្រុមគោព្រៃជំទង់កម្ពុជា មិនធ្លាប់បានឈ្នះមេដាយនោះទេ ហើយលទ្ធផលឡើងខ្ពស់បង្អស់ គឺត្រឹមវគ្គដណ្តើមយកមេដាយសម្រិត ឬចំណាត់ថ្នាក់ទី ៣ ដែលបញ្ចប់ការប្រកួតយើងបានឈរត្រឹមលេខ ៤។
នោះគឺនៅឆ្នាំ ២០១៩ កំឡុងពេលដែល U23 កម្ពុជា ស្ថិតក្នុងពូល A ជាមួយក្រុមមីយ៉ាន់ម៉ា, ហ្វីលីពីន, ម៉ាឡេស៊ី និងទីម័រខាងកើត។ ឆ្លងកាត់ការប្រកួត ៤ ជុំ យើងទទួលបាន ៧ ពិន្ទុស្មើនឹងក្រុមម្ចាស់ផ្ទះ តែធៀបគ្រាប់បាល់បាល់ចំណេញ ខាងកម្ពុជាមានច្រើនជាង ដូច្នេះក៏សម្រេចឲ្យយើងអាចឡើងទៅកាន់វគ្គ ៤ ក្រុមចុងក្រោយ។ ពេលនោះកម្ពុជា ឡើងទៅប៉ះវៀតណាម តែសោកស្តាយបរាជ័យទក់សាច់ ៤-០ ជួនពេលដែលឥណ្ឌូណេស៊ី យកឈ្នះក្រុមខ្លាំងក្នុងពូល A គឺមីយ៉ាន់ម៉ា ៤-២។
បន្តទៅវគ្គសម្រេចលទ្ធផលបញ្ចប់ គឺវៀតណាម បានក្លាយជាក្រុមឈ្នះជើងឯក ដែលបានមេដាយមាស ក្រោយយកឈ្នះលើក្រុមបានមេដាយប្រាក់ គឺឥណ្ឌូណេស៊ី ៣-០ ហើយមីយ៉ាន់ម៉ា ជាក្រុមបានមេដាយសម្រិត ក្រោយបំបាក់ក្រុមកម្ពុជា ជាមួយលទ្ធផលថែមម៉ោងបាល់ប៉េណាល់ទី ៥-៤។
សរុបស្ថិតិនៅស៊ីហ្គេមតាំងពីឆ្នាំ ២០០១ មកទល់ឆ្នាំ ២០១៩ គឺយើងរមែងធ្លាក់ត្រឹមវគ្គចែកពូល ដែលលើកលែងតែព្រឹត្តិការណ៍សារមុន យើងឡើងបានដល់វគ្គពាក់កណ្ដាលផ្ដាច់ព្រ័ត្រ និងបានលេខ ៤។ ឆ្លងកាត់ ៤០ ប្រកួត U23 កម្ពុជា ឈ្នះ ៤ ស្មើ ៥ និងចាញ់ ៣១ រកបាន ៣៨ គ្រាប់ និងរបូត ១៣៣ គ្រាប់។
ងាកមកព្រឹត្តិការណ៍លើកទី ៣១ សារនេះវិញ យើងកំពុងចាប់ផ្ដើមជំហានដ៏ល្អមួយហើយ ដូច្នេះក៏ជូនពរឲ្យក្រុម U23 អាចបន្តការយកបាន ៣ ពិន្ទុពីសិង្ហបុរី ដើម្បីជាទុនធំ ក្នុងការក្ដោបក្ដាប់ឱកាសឆ្ពោះទៅវគ្គបន្ត។ តើអាចទេ វិញ្ញាសាបាល់ទាត់បុរស យើងអាចសាងប្រវត្តិសាស្ត្រ ឈ្នះមេដាយជាលើកដំបូងនៅស៊ីហ្គេម?
គួររំឭកថាព្រឹត្តិការណ៍កីឡាអាស៊ីអាគ្នេយ៍ ឬហៅកាត់ស៊ីហ្គេម សម្រាប់កម្ពុជា នឹងទទួលបានសិទ្ធធ្វើជាម្ចាស់ផ្ទះជាលើកដំបូង នៅឆ្នាំក្រោយ ២០២៣ ដែលកំណត់រៀបចំឡើងនាចន្លោះថ្ងៃទី ៥ ដល់ ១៦ ឧសភា៕
ប្រភព៖ Wikipedia