ខ្សែប្រយុទ្ធវ័យក្មេង Eddie Nketiah នៅរដូវកាល ២០២១/២២ បានបង្ហាញទម្រង់លេងយ៉ាងល្អ តែយ៉ាងណាក៏មានមតិមួយចំនួន ហាក់ជំរុញឲ្យកីឡាករគួរគិតដល់ផ្លូវបែក មុនរដូវកាលថ្មីចូលមកដល់ ប្រសិនជាចង់ទទួលបានឱកាសក្លាយជាខ្សែប្រយុទ្ធលំដាប់កំពូលពិតប្រាកដ។ ស្ថិតិរដូវកាលនេះ កីឡាករវ័យ ២២ ឆ្នាំ បង្ហាញខ្លួន ២៥ ប្រកួត រកបាន ៩ គ្រាប់និង Assist ១ លើក ដោយទើបតែរកបានពីរគ្រាប់ម្នាក់ឯង នៅប្រកួតយកឈ្នះ Leeds United កន្លងទៅ។
បើតាមសារព័ត៌មាន The Daily Mail ចុះផ្សាយថា ក្លឹបរួមលីគ គឺ West Ham United ក្រោយឃើញឱកាសសារនេះ ក៏ពួកគេហាក់ចាប់អារម្មណ៍ជាខ្លាំង រួចចង់សម្រេចការចរចានាំយក Nketiah ចេញពីកាំភ្លើងធំ ត្រឹមទីផ្សារដោះដូររដូវក្តៅខាងមុខ។ ទន្ទឹមដែលសុពលភាពកុងត្រាសេសសល់ដល់ចុងខែមិថុនា ឆ្នាំ ២០២៣ ដូច្នេះហាងឆេងតម្លៃខ្លួន គឺថ្លៃល្បាក់ជាង ១០ លានផោន។
កីឡាករសញ្ជាតិអង់គ្លេស ដែលលេងតំណែងប្រយុទ្ធកណ្តាល ជាការពិតបើបន្តនៅក្រុមលោក Mikel Arteta គឺអាចពិបាកប្រជែងជម្រើសដំបូង ដ្បិតបើគុណភាពរបស់គេល្អក៏ដោយ។ អតីតកាលគេធ្លាប់ទៅខ្ចីជើងលេងឲ្យ Leeds ដូច្នេះការផ្ទេរទៅ West Ham ក៏រាប់បានជាបទពិសោធន៍ថ្មីសន្លាងបន្ថែមដែលគួរតែសាកល្បង៕
ប្រភព៖ The Daily Mail