ក្លឹបមេឃខៀវ Manchester City ត្រូវបានប្រភពសារព័ត៌មានគួរឲ្យទុកចិត្ត The Athletic ចុះផ្សាយថា បានចរចាឈានដល់កិច្ចព្រមព្រៀងសម្រេចហើយ រវាងភាគីកីឡាករ Erling Haaland សម្រាប់ការនាំយកមកចូលរួម នៅទីផ្សារដោះដូរខាងមុខ។ ការប្រកាសផ្លូវការ កំណត់នឹងធ្វើឡើងនៅចុងសប្តាហ៍នេះ ពោលបន្ទាប់ពីចប់ប្រកួតចុងក្រោយរបស់ Dortmund ទល់ Hertha។
ប្រភពបានឲ្យដឹងថា កីឡាករវ័យ ២១ ឆ្នាំ នឹងកំណត់គ្រោងឈុតមេឃខៀវ Man City ចាប់ពីរដូវកាលក្រោយតទៅ តែការចរចាលក្ខខណ្ឌតម្លៃពលកម្ម និងកិច្ចព្រមព្រៀងលម្អិតនានា មិនទាន់ត្រូវបានទម្លាយនៅឡើយ។ គ្រប់យ៉ាងគឺ ដំណើរការឆ្លងកាត់រវាងភាគីឪពុក លោកAlf Inge ជាអ្នករត់ការផ្ទាល់ ហើយក៏ធ្លាប់ជាអតីតកីឡាករនៅក្លឹបអង់គ្លេសខាងលើផងដែរ។
បើតាមដឹងចំពោះតម្លៃខ្លួន ដូចបានបញ្ជាក់ពីមុនមក គឺវាស្ថិតនៅតម្លៃផ្តាច់កុងត្រា Release clause ថ្លៃ ៧៥ លានអឺរ៉ូ ឬល្បាក់ ៦៣ លានផោន។ រំឭកឲ្យដឹង ស្ថិតិជាមួយ Dortmund ចាប់តាំងការមកចូលរួមនៅខែមករា ឆ្នាំ ២០២០ សរុបការបង្ហាញខ្លួន ៨៨ ប្រកួត គេរកបាន ៨៥ គ្រាប់ឯណោះ។ ក្រៅពី Man City ក៏មានក្លឹបឯទៀត ដូចជា Real Madrid, Barcelona, Bayern Munich និង PSG ជាដើម ផងដែរ ដែលបាក់ចិត្តមកលើកីឡាករន័រវេស៕
ប្រភព៖ The Athletic