ក្លឹប Inter Milan នឹងមិនព្យាយាមហាមឃាត់ Lautaro Martinez ឲ្យបន្តនៅនោះទេ ប្រសិនណាជាក្លឹប អាចទទួលបានសំណើចរចានៅតម្លៃដ៏ខ្ពស់មួយ នាទីផ្សារដោះដូររដូវក្តៅខាងមុខ។ បើតាមសារព័ត៌មាន ESPN ចុះផ្សាយថា ក្លឹបអាណាព្យាបាលដាក់តម្លៃកំណត់ ៦០ លានអឺរ៉ូ ឬល្បាក់ ៦៣ លានដុល្លារអាមេរិក។
កីឡាករអាហ្សង់ទីន សេសសល់សុពលភាពកុងត្រាដល់ចុងខែមិថុនា ឆ្នាំ ២០២៦ ហើយតាមដំណឹងចុងក្រោយ គេស្ថិតក្រោមការឃ្លាំមើលមិនដាក់ភ្នែកពីសំណាក់ក្លឹបចង់បាន នៅឯអង់គ្លេស គឺ Arsenal។ បើទោះបី កីឡាករវ័យ ២៤ ឆ្នាំ កំពុងរីករាយនឹងការលេងឲ្យ Inter តែក្លឹបក៏នឹងដាច់ចិត្តដកគេចេញ ក្នុងលក្ខខណ្ឌដែលនិយាយត្រូវតម្លៃខ្លួន ដូចបានកំណត់ពីខាងដើម។
ស្ថិតិរដូវកាល ២០២១/២២ សម្រាប់ Martinez គេបានដើរតួយ៉ាងសំខាន់ ជំនួស Romelu Lukaku ពោលរកបានដល់ទៅ ២៣ គ្រាប់និង Assist ៣ លើក នៅការបង្ហាញខ្លួន ៤៥ ប្រកួត។ គិតត្រឹមជុំទី ៣៦ ក្លឹប Inter ឈរលេខ ២ មាន ៧៨ ពិន្ទុ ចាញ់ពីរពិន្ទុ ធៀបនឹងក្រុមកំពូលតារាង AC Milan ដូច្នេះមានន័យថា ឱកាសប្រជែងពានលីគកំពូល គឺនៅតែមាន៕
ប្រភព៖ ESPN