ពេលនេះក្លឹបកាំភ្លើងធំ Arsenal ក៏ដូចជា Chelsea និង Tottenham Hotspur កំពុងប្រជែងពិន្ទុយ៉ាងប្រកិត ដោយក្នុងចំណោមពួកគេមាន ២ ក្រុមប៉ុណ្ណោះ អាចបានកៅអីលេង UCL រដូវកាលក្រោយ ហើយមួយទទួលបានត្រឹមកៅអី Europa League។ យ៉ាងណាវាក៏ស៊ីសងលើលទ្ធផលនាពេលខាងមុខ ដែល Spurs ត្រូវបើកកីឡដ្ឋានក្នុងទីក្រុងឡុង ស្វាគមន៍ក្លឹបរួមទីក្រុង គឺ Arsenal នាវេលាម៉ោង ០១:៤៥ នាទីទាបភ្លឺ ឈានចូលថ្ងៃសុក្រ ទី ១៣ ឧសភា មានផ្សាយផ្ទាល់លើទំព័រ CTS Sports។
មុនការប្រកួតមកដល់ ងាកមកមតិអ្នកវិភាគលើ Gary Neville បានប្រមើលមើលឃើញថា ក្លឹបដែលនឹងយកបាន ៣ ពិន្ទុពីការប្រកួតខាងលើ គឺជាក្លឹបមាន់ខ្នាយមាស Tottenham Hotspur។ ក៏ដោយសារតែទម្រង់លេងយ៉ាងល្អកាលពីប៉ះ Liverpool នៅ Anfield ថ្ងៃមុន ហើយទប់យកបាន ១ ពិន្ទុស្មើ។ នេះបើក្រុមដឹកនាំដោយលោក Antonio Conte ឈ្នះ នោះនឹងរំកិលដល់ ៦៥ ពិន្ទុ ហើយ Arsenal នៅឈរលេខ ៤ ដដែលមាន ៦៦ ពិន្ទុ។
Neville និយាយ៖ “ខ្ញុំគិតថាប្រកួតសារនេះ នឹងកាន់តែជក់ចិត្តបន្ថែមទៀត វាជួនពេលដែលប្រកួតត្រូវលើកពេល ហើយមកលេងចំពេលដែលក្រុមទាំងពីរត្រូវប្រជែងយកកៅអី Champions League ដូចគ្នា ខ្ញុំមើលឃើញថា Arsenal នឹងចាញ់ ហើយនឹងក្លាយជាយប់ជ័យជម្នះរបស់ Tottenham ក៏ដោយសារ យើងមើលថ្ងៃមុន ពេលពួកគេលេងទល់ Liverpool នេះទល់ក្រុមដ៏ល្អបំផុតមួយ តែពួកគេនៅធ្វើបានល្អដដែលនៅទឹកដី Anfield”៕
ប្រភព៖ Metro