និយាយជាសាធារណៈកាលពីពេលថ្មីៗ នេះ ប្រធានសហព័ន្ធបាល់ទាត់បារាំង លោក Noel Le Graet បានបង្ហើបអំពីទ្រនំថ្មី ដែល Zinedine Zidane អាចនឹងទៅដឹកនាំ ពោលមួយអាចជាជម្រើសជាតិបារាំង ទីពីរអាចជាក្លឹបយក្ស Paris Saint-Germain។ បញ្ជាក់ អ្នកចាត់ការវ័យ ៤៩ ឆ្នាំ បានទំនេរជើង តាំងពីថ្ងៃទី ៣០ មិថុនា ឆ្នាំ ២០២១ មកម្ល៉េះ។
លោក Le Graet និយាយ៖ “ដំបូងអ្នកត្រូវប្រយ័ត្ននូវពាក្យដែលបាននិយាយចេញទៅ តែយើងបានឃើញហើយ Zidane កាលនៅ Madrid គេពោរពេញដោយគុណភាព ហើយក្នុងការគិតរបស់ប្រជាជនបារាំង Zidane អាចមកក្លាយជាអ្នកចាត់ការដ៏ជោគជ័យនៅជម្រើសជាតិ ប្រសិនណា Dider [Deschamps] គិតពីការចែកផ្លូវនៅពេលខាងមុខ”។
លោកបន្ត៖ “តែយ៉ាងណាខ្ញុំនឹងអត់និយាយអ្វីទាំងអស់ គ្រាន់ថាបើ Deschamps គេអត់ចង់បន្តកុងត្រាថ្មីទេ នោះយើងនឹងសម្លឹងមើលទៅ Zidane តែក៏ប្រហែលជាគេអាចទៅដឹកនាំក្លឹប PSG ផងដែរ ដូច្នេះហើយពេលវេលានេះ អ្វីដែលយើងត្រូវធ្វើ គឺធានាឲ្យបាននូវវត្តមាន Didier ជាពិសេសការដណ្តើមយកជោគជ័យនៅពាន World Cup”៕
ប្រភព៖ Football-Espana