ក្រោយការទទួលមរណភាពកាលពីចុងឆ្នាំ ២០២០ វីរបុរសលោក Diego Maradona បានបន្សល់ទុកនូវភាពអាឡោះអាល័យ កេរ្តិ៍ឈ្មោះ និងកំណត់ត្រា ក៏ដូចជារបស់របរដ៏មានតម្លៃជាច្រើន ហើយថ្មីៗនេះ បានផ្តល់ឲ្យអតីតកីឡាករជម្រើសជាតិអង់គ្លេសជំនាន់មុនឆ្នាំ ៩០ ម្នាក់ អាចក្លាយជាសេដ្ឋីប្រាក់លាន ត្រឹមតែមួយពព្រិចភ្នែក។
នោះក៏ដោយសារតែអតីតកីឡាករជើងចាស់របស់តោកំណាច គឺលោក Steve Hodge បានសម្រេចចិត្ត លក់អាវរបស់ Diego Maradona នៅតម្លៃបំបែកកំណត់ត្រាពិភពលោក កាលពីពេលថ្មីៗនេះ។ និយាយអំពីដើមទងនៃការទទួលបានអាវរបស់ Maradona គឺកើតឡើងនៅកំឡុងព្រឹត្តិការណ៍ FIFA World Cup ឆ្នាំ ១៩៨៦ នាវគ្គ ១/៤ ផ្ដាច់ព្រ័ត្រ ដែលអាហ្សង់ទីន កំណត់លេងទល់អង់គ្លេស នៅទឹកដីប្រទេសម៊ិកស៊ីកូ។
ក្រោយរំលងចូលតង់ទី ២ បាន ៦ នាទី Diego Maradona បានរត់ទៅក្នុងប្រអប់ទី នៅពេលបាល់ហោះចេញពីជើងខ្សែការពារអង់គ្លេស ហើយលោកបានប្រើដៃវ៉ៃបាល់បញ្ចូលទី។ ពេលនោះបើទោះបីមានការព្យាយាមតវ៉ាពីកីឡាករក្រុមតោកំណាច ក៏អាជ្ញាកណ្តាលនៅតែផ្តល់ឲ្យជាគ្រាប់បាល់ចូលទី ណាមួយដោយសារស្ថិតក្នុងសម័យកាលមិនទំនើប គ្មាន VAR ចាំត្រួតពិនិត្យផង។ គ្រាប់បាល់នោះហើយ គេឲ្យឈ្មោះថា “Hand Of God”។
រំលងតែ ៤ នាទីបន្ទាប់ ខ្សែប្រយុទ្ធរបស់ក្រុមអាហ្សង់ទីនដដែល ក៏បានអូសបាល់ញាក់ផុតខ្សែការពារជាច្រើន តាំងពីពាក់កណ្តាលតារាង មកចូលក្នុងប្រអប់ហើយបញ្ចប់ទីមិនគួរឲ្យជឿ។ នេះគ្រាប់បាល់ដ៏អស្ចារ្យ ២ កើតឡើងដោយមនុស្សតែមួយនៅថ្ងៃតែមួយ ដល់ថ្នាក់ខ្សែបម្រើ Steve Hodge មានការកោតសរសើរជាខ្លាំង ហើយក៏ដើរទៅសុំអាវរបស់ Maradona ក្រោយចប់ការប្រកួត។
បន្ទាប់មក លោក Hodge បានយកវាទៅរក្សាទុកនៅសារមន្ទីរបាល់ទាត់ជាតិ ក្នុងចក្រភពអង់គ្លេស តែស្ថិតនៅក្រោមឈ្មោះជាកម្មសិទ្ធិរបស់លោកដដែល។ ទើបតែមកដល់ខែមេសា ឆ្នាំ ២០២២ កន្លងទៅ បុរសវ័យ ៥៩ ឆ្នាំក៏សម្រេចប្រកាសបើកឲ្យមានការដេញថ្លៃ សម្រាប់អាវដ៏មានតម្លៃមួយនោះ រួចរំលងតែមួយខែ ក៏រកឃើញម្ចាស់ ដេញថ្លៃនៅតម្លៃចុងក្រោយបង្អស់។
ពុំមានការបញ្ជាក់ច្បាស់ពីអត្តសញ្ញាណអ្នកដាក់ដេញថ្លៃចុងក្រោយ តែនិយាយអំពីតម្លៃ គឺទទួលបានដល់ទៅ ៧,១៤ លានផោន ឬប្រហែល ៨,៩៥ លានដុល្លារអាមេរិក។ នេះបើតាមទិន្នន័យពី Guiness World Records បានចុះផ្សាយ។ ហ្នឹងហើយអត់ស្តាប់ច្រឡំទេ អាវរបស់ Maradona កាលពីឆ្នាំ ១៩៨៦ មួយនោះ គឺកំពុងរុញឲ្យលោក Hodge អាចសោយសុខនឹងប្រាក់ជាច្រើនលានដុល្លារ នៅក្រោយការចូលនិវត្ត។
គួរបញ្ជាក់ថា ទំហំដេញថ្លៃនេះ បានបំបែកកំណត់ត្រាចាស់របស់អនុស្សាវរីយក្នុងវិស័យកីឡាលក់បានថ្លៃបំផុត កន្លងមកធ្លាប់មានស្លឹករឹតដែលបានចារដោយដៃផ្ទាល់កាលពីព្រឹត្តិការណ៍អូឡាំពិក ឆ្នាំ ១៨៩២ មានតម្លៃ ៨,៨ លានដុល្លារ លក់ចេញកាលពីឆ្នាំ ២០១៩៕
ប្រភព៖ បរទេស