Cristiano Ronaldo និង Lionel Messi បានក្លាយជាប្រធានបទដែលគេលើកមកវែកញែកឥតឈប់ ហើយបើទោះពីពេលនេះ អ្នកទាំងពីរឈានចូលអាយុល្បាក់ ៣០ ឆ្នាំក្រាស់ក៏ដោយ ក៏នៅតែមានការជជែកជាបន្តបន្ទាប់ ពោលដរាបណាមិនទាន់ព្យួរស្បែកជើងពីបាល់ទាត់។
មតិរបស់អ្នកគាំទ្រ ក៏ដូចជាកីឡាករជើងចាស់ថ្មី រមែងមានការយល់ឃើញខុសៗពីគ្នា ដោយឡែកងាកមកក្នុងអត្ថបទនេះ CTS Sports សូមធ្វើការបង្ហាញអំពីការលើកឡើង របស់ម្ចាស់ពាន Ballon d’Or ៤ រូប ដែលនិយាយច្បាស់ៗថា Ronaldo ល្អជាង Messi។
៤) Ruud Gullit
អតីតកីឡាករជម្រើសជាតិហូឡង់ បានមានឈ្មោះបោះសំឡេងខ្លាំង នៅកំឡុងទសវត្សឆ្នាំ ៨០ និង ៩០ ហើយក៏ក្លាយជាម្ចាស់ពានឯកត្តជន Ballon d’Or នៅឆ្នាំ ១៩៨៨ គ្រាក្រុមហូឡង់ ក្លាយជាម្ចាស់ពាន Euro។
Gullit ធ្លាប់បាននិយាយ៖ “ខ្ញុំគិតថា Ronaldo ជាកីឡាករល្អបំផុតគ្រប់ពេលវេលា គេអាចសម្រេចគ្រប់យ៉ាងបាននៅតាមបណ្តាក្លឹបនានាទាំងអស់ ហើយជាមួយជម្រើសជាតិ ក៏បានលើកពានរង្វាន់ European Championship ផងដែរ ដោយសម្រាប់ Messi គេអាចឈានដល់កម្រិត Ronaldo ប្រសិនណា ជាអាចជោគជ័យនៅក្លឹបក្នុងប្រទេសបីផ្សេងគ្នា ដូចកីឡាករព័រទុយហ្គាល់បាន”។
៣) Michael Owen
ជាអតីតកីឡាករនៃក្លឹប Liverpool និង Man Utd ហើយបានក្លាយជាម្ចាស់ពាន Ballon d’Or កាលពីឆ្នាំ ២០០១។ Owen ធ្លាប់និយាយប្រាប់ BT Sport គ្រា Real Madrid លើកពាន UCL ឆ្នាំ ២០១៧៖ “ការរកគ្រាប់បាល់មិនជារឿងងាយទេក្នុងវិស័យបាល់ទាត់ តែសម្រាប់ Ronaldo បង្ហាញវាមកហាក់ដូចស្រួលណាស់ ទាំងក្បាល ទាំងជើងឆ្វេង ស្តាំ នេះសម្រាប់ Messi ពិបាករឿងការប្រើប្រាស់ក្បាលតែតបញ្ចូលទីបន្តិច”។
លោកបន្ត៖ “ដូច្នេះបើយើងនិយាយអំពីភាពពេញលក្ខណៈគឺ Ronaldo គេមានប្រៀបជាងហើយ ទាំងលឿនជាង ទាំងមានកាយសម្បទាល្អជាង គឺល្អជាងមួយសព្វ”។
២) Kaka
ដោយឡែកងាកមកម្ចាស់ពាន Ballon d’Or ឆ្នាំ ២០០៧ Kaka ក៏បាននិយាយ៖ “រវាង Ronaldo និង Messi គឺម្យ៉ាងម្នាក់ តែបើឲ្យខ្ញុំរើស គឺជ្រើសយក Ronaldo ព្រោះឱកាសនៃការបរាជ័យក្នុងក្រុមមួយដែលមានគាត់ គឺទាបបំផុត គាត់លះបង់ខ្ពស់ណាស់ គាត់ផ្តោតខ្លាំងណាស់ សម្រាប់ការប្រកួតនីមួយៗ”។
១) Zinedine Zidane
ដោយឡែកងាកមកអតីតកីឡាករជម្រើសជាតិបារាំង ក៏ដូចជាម្ចាស់ពាន Ballon d’Or ឆ្នាំ ១៩៩៨ បានបង្ហាញការយល់ឃើញបែបនេះ៖ “Cristiano គឺជាកីឡាករល្អបំផុត ដោយយើងមើលឃើញ Messi ជាគូប្រជែងដ៏តានតឹងមួយ តែសម្រាប់ខ្ញុំ Ronaldo គឺល្អប្រសើរជាង រួចគ្មានពាក្យអ្វីរៀបរាប់ពីគេបានឡើយ”៕
ប្រភព៖ បរទេស