បន្ទាប់ពីយកឈ្នះទៅលើ Manchester City ទាំងត្រដាបត្រដួសកាលពីយប់មិញ ទីបំផុតក៏កំណត់ឲ្យក្លឹប Real Madrid អាចទទួលបានឱកាស ឆ្ពោះទៅវគ្គផ្តាច់ព្រ័ត្រ ត្រូវមកជួបសត្រូវចាស់ Liverpool នាវេលាម៉ោង ០២:០០ នាទីទាបភ្លឺ ឈានចូលថ្ងៃអាទិត្យ ទី ២៩ ឧសភា នឹងមានផ្សាយផ្ទាល់លើទំព័រ CTS Sports។
នេះជាការប៉ះគ្នាជាថ្មី បន្ទាប់ពីធ្លាប់ជួបគ្នាម្តងដែរ កាលវគ្គផ្តាច់ព្រ័ត្រ រដូវកាល ២០១៧/១៨ គ្រានោះ Mohamed Salah រងការឈឺចាប់ជាពិសេស ហើយក្រុមក៏ចាញ់ ក្រោមលទ្ធផល ៣-១។ យ៉ាងណាមកដល់ឆ្នាំ ២០២២ បំណងប្រាថ្នារបស់ខ្សែប្រយុទ្ធអេហ្សីប ដែលចង់ជួប Real Madrid ជាជាង Man City នៅវគ្គចុងក្រោយ ពានអឺរ៉ុប ក៏បានក្លាយជាការពិត។ ងាកមកក្នុងអត្ថបទនេះ យើងធ្វើការបង្ហាញពីប្រវត្តិធ្លាប់ប៉ះគ្នា រវាងក្រុមទាំងពីរ ក៏ដូចជាកំណត់ត្រាគួរឲ្យចាប់អារម្មណ៍មួយចំនួន ដែលបានកើតឡើងកាលពីយប់មិញ៖
Real Madrid ធ្លាប់ប៉ះ Liverpool សរុប ៨ លើក ដោយជួបតែនៅពានអឺរ៉ុប មិនធ្លាប់លេងតេស្តគីឡូបែបមិត្តភាពអីនោះឡើយ។ លើកដំបូងកើតឡើងនៅឆ្នាំ ១៩៨១ តាំងពីជំនាន់ European Cup ដែល Real Madrid ចាញ់ ០-១ នៅវគ្គផ្ដាច់ព្រ័ត្រ ជាសម័យកាលពានអឺរ៉ុបលើកទី ៣ របស់ហង្ស។ ក្រោយៗមកប៉ះគ្នាជាបន្តបន្ទាប់ ទាំងនៅវគ្គចែកពូល វគ្គចាញ់ធ្លាក់ ហើយលើកចុងក្រោយបង្អស់ កាលពីរដូវកាល ២០២០/២១ នាវគ្គ ៨ ក្រុម ដោយសរុបទាំងពីរជើង Real យកឈ្នះ ៣-១។
សរុបលទ្ធផលប៉ះគ្នាទាំង ៨ លើក គឺ Real Madrid មានប្រៀបជាងបន្តិច ដោយឈ្នះ ៤ ស្មើ ១ និងចាញ់ ៣ ហើយគ្រាប់បាល់រកបាន ខាងក្លឹបអេស្ប៉ាញ ធ្វើបាន ១០ គ្រាប់ ខណៈក្លឹបអង់គ្លេស ធ្វើបាន ៨ គ្រាប់។ ដោយឡែកបើនិយាយពីស្ថិតិ រវាងអ្នកចាត់ការ ទល់អ្នកចាត់ការ គឺ Carlo Ancelotti ប៉ះ Jurgen Klopp សរុប ១០ លើក ហើយខាងគ្រូសញ្ជាតិអ៊ីតាលី ឈ្នះ ៤ ស្មើ ៣ និងចាញ់គ្រូអាល្លឺម៉ង់ ៣។ ដូច្នេះបើយើងនិយាយទាំងស្ថិតិរវាងក្លឹប ទល់ក្លឹប គ្រូទល់គ្រូ គឺ Real Madrid មានប្រៀបជាង។
រំឭកទៅស្ថិតិកាលពីយប់មិញបន្តិច យើងចាប់អារម្មណ៍ លោក Ancelotti ក៏ឈោងបានកំណត់ត្រាគួរឲ្យចាប់អារម្មណ៍ ដោយបំបែកកំណត់ត្រាចាស់របស់លោក Sir Alex Ferguson នោះគឺការអាចដឹកនាំក្រុមឡើងទៅវគ្គផ្តាច់ព្រ័ត្រ ច្រើនជាងនរណាទាំងអស់ ពោលគឺ ៥ លើក។ នេះយកឈ្នះ លើ Marcelo Lippi, Jurgen Klopp ក៏ដូចជា Sir Alex ដែលធ្លាប់ឡើងបាន ៤ លើកប៉ុណ្ណោះ។
ងាកទៅកំណត់ត្រារបស់កីឡាករឯណោះវិញ សម្រាប់ Karim Benzema គេបានតាមស្មើកំណត់ត្រារបស់ Cristiano Ronaldo ដោយឈានដល់តួលេខគ្រាប់បាល់ទី ១០ នៅវគ្គចាញ់ធ្លាក់ ឬ Knockout Stage។ នេះបើនៅវគ្គផ្តាច់ព្រ័ត្រ ទល់ Liverpool កីឡាករបារាំង អាចបន្ថែមត្រឹមតែមួយគ្រាប់ ក៏ប្រាកដជានឹងសាងឈ្មោះនៅកំណត់ត្រាថ្មី នាំមុខទៅលើតារាឆ្នើមសញ្ជាតិព័រទុយហ្គាល់ជាក់ជាមិនខាន។
រីឯ ខ្សែបម្រើ Thiago Alcantara នៃក្លឹប Liverpool គេអាចមានឱកាសក្លាយជាកីឡាករទី ២ ក្នុងប្រវត្តិសាស្រ្ត ដែលអាចលើកពានរង្វាន់ Champions League ជាមួយក្លឹប ៣ ផ្សេងពីគ្នា។ កន្លងមក បុរសសញ្ជាតិអេស្ប៉ាញ ស្គាល់រួចមកហើយនៅការលើកពានអឺរ៉ុប ជាមួយ Barcelona នៅរដូវកាល ២០១០/១១ និងជាមួយ Bayern Munich នៅរដូវកាល ២០១៩/២០ ហើយបើសម្រេចបាននៅរដូវកាល ២០២១/២២ នេះទៀត នោះនឹងតាមទាន់កំណត់ត្រាជើងចាស់ Clarence Seedorf បានហើយ។ បញ្ជាក់អតីតជើងចាស់ហូឡង់ ធ្វើបានកាលនៅ Ajax រដូវកាល ១៩៩៤/៩៥, Real Madrid រដូវកាល ១៩៩៧/៩៨ និងជាមួយ AC Milan ជាក្លឹបទី ៣ នៅរដូវកាល ២០០២/០៣ និង ២០០៦/០៧៕
ប្រភព៖ បរទេស | ប្រែសម្រួល៖ ក្នុងស្រុក