លោក Carlo Ancelotti បាននិយាយថាក្រុម Real Madrid របស់លោកមានគ្រប់យ៉ាងទាំងអស់ ដើម្បីទទួលបានជ័យជម្នះលើក្រុម Manchester City នៅយប់មិញនេះ។
គ្មានក្រុមណាដែលធ្វើបានដូចក្រុម Real Madrid នៅយប់មិញឬក្នុងពានរង្វាន់ UEFA Champions League នោះទេ ដែលពួកគេតែងតែបង្កើតប្រវត្តិសាស្ត្រជានិច្ច។ ដោយការវាយបកនៅចុងម៉ោង គឺកើតមានឡើងសឹងគ្រប់ប្រកួតទៅហើយ។ ជាក់ស្ដែងទល់ក្រុម Man City នៅយប់មិញនៅនាទី៩០+ ពួកគេរកបានដល់ទៅ២គ្រាប់ដោយ Rodrygo ហើយម៉ោងបន្ថែម១៥នាទី២ដងទៀត Karim Benzema ជាអ្នកសម្រេចគ្រាប់បាល់បានទៀត។ ចុងបញ្ចប់ ក្រុមរបស់លោក Ancelotti បានឡើងទៅវគ្គបន្ដ ដោយយកឈ្នះ Man City នៅជើងទី២ ក្នុងលទ្ធផល ៣-១ សរុបទាំងពីរជើង ៦-៥។
ក្រោយពីចប់ការប្រកួតទៅ លោក Ancelotti បាននិយាយថា៖ “ពេលគ្រប់គ្នាគិតថាការប្រកួតវាអស់ឱកាសទៅហើយ តែចុងក្រោយវាមិនមែនបែបនោះទេ។ យើងបានដាក់កម្លាំងកាយចិត្តលើវានៅចុងម៉ោង ដើម្បីឈ្នះការប្រកួត ហើយដើម្បីឈ្នះយើងក៏ទាមទារសំណាងមកខាងយើងខ្លះដែរ។ យើងជាក្រុមមិនដែលបោះបង់ចោលនោះទេ។ គ្រប់យ៉ាងសុទ្ធតែអាចកើតមានរឿងប្លែកៗជានិច្ចក្នុងពានរង្វាន់ UEFA Champions League ”៕ប្រភព៖ MARCA