លោក Rio Ferdinand បានចង្អុលដល់ឈ្មោះ ខ្សែប្រយុទ្ធ Luis Diaz ថាជាការចុះហត្ថលេខាដ៏ល្អដាច់គេប្រចាំរដូវកាល ២០២១/២២ បន្ទាប់ក្លាយជាចំណែកជួយក្លឹប Liverpool យកឈ្នះ Villarreal ហើយបានឡើងទៅកាន់វគ្គផ្តាច់ព្រ័ត្រ UCL កំណត់ត្រូវជួបសត្រូវចាស់ Real Madrid។
អតីតកូនបិសាចខាងលើ និយាយ៖ “ស្តាប់ណា Luis Diaz គេពិតជាបានជះឥទ្ធិពលដ៏ធំធេងដល់ Liverpool ជាពិសេសនៅតំបន់ប្រយុទ្ធ មុនគេមកដល់ យើងនិយាយដែរថា បញ្ហារបួសអាចឲ្យក្រុមទាំងមូលធ្លាក់ចុះ ឥឡូវគេបានមកកែប្រែស្ថានការណ៍ ធ្វើឲ្យមានការភ្ញាក់ផ្អើលខ្លាំង អ្នកអាចមើលបាន របៀបដែលគេបណ្តើរបាល់ បម្លាស់ទីរបស់គេ នេះរាប់បានជាការចុះហត្ថលេខាដ៏លេចធ្លោបំផុតហើយ”។
គួររំឭកដែរថា កីឡាករកូឡុំប៊ី នៅរដូវកាលនេះ បានផ្ទេរមកចូលរួមជាមួយហង្ស នាចុងខែមករាទៅហើយ តែទៅមើលស្ថិតិពិតជាគួរឲ្យចាប់អារម្មណ៍ ដោយបង្ហាញខ្លួន ២០ ប្រកួត រកបាន ៤ គ្រាប់និង Assist ៣ លើក។ សមិទ្ធផលធំៗរបស់គេ រមែងកើតឡើងនៅ UCL ទើបជាចំណែកជួយចូកជួយចែវឲ្យក្រុមដឹកនាំដោយលោក Jurgen Klopp អាចឡើងមកដល់វគ្គចុងក្រោយនេះ។ សុពលភាពកុងត្រាកីឡាករវ័យ ២៥ ឆ្នាំ សេសសល់ដល់ចុងខែមិថុនា ឆ្នាំ ២០២៧ ខណៈហាងឆេងតម្លៃខ្លួន ត្រូវបានគេប្រមើលមើល ថានឹងឡើងគុណទ្វេជា ២ ប្រសិនបញ្ចប់រដូវកាល កីឡាករអាចលើកពាន UCL ឬសូម្បីតែ PL៕
ប្រភព៖ BeSoccer