Diego Maradona ដ្បិតបើលោកបានទទួលមរណភាពទៅហើយក្តី ប៉ុន្តែរបស់របរសេសសល់មួយចំនួន បាននឹងកំពុងជួយកើបចំណូលរាប់លានដុល្លារដល់អ្នកជំនាន់ក្រោយ ដែលនៅសេសសល់។ ជាក់ស្តែងដូចអតីតជើងចាស់នៅជម្រើសជាតិអង់គ្លេស លោក Steve Hodge បានទទួលប្រាក់ពីការដេញថ្លៃ ដល់ទៅជិត ៩ លានដុល្លារពីការលក់អាវ “Hand of God”។
អតីតខ្សែបម្រើខាងលើ គឺជាចំណែកនៅការប្រកួតវគ្គ ៨ ក្រុមចុងក្រោយ ពាន FIFA World Cup កាលពីឆ្នាំ ១៩៨៦ ដែលសារនោះ អាហ្សង់ទីនបានយកឈ្នះទៅលើក្រុមអង់គ្លេស។ មានគ្រាប់បាល់គួរឲ្យចាប់អារម្មណ៍របស់ Maradona ដែលបានប្រជែងជាមួយអ្នកចាំទី តាមរយៈការវ៉ៃបាល់បញ្ចូលទី ដូចជាកីឡាករបាល់ទះទៅហើយ។ គ្រាប់បាល់នោះ អាជ្ញាកណ្តាលក៏ផ្តល់ឲ្យ ក្រោយពិនិត្យមិនបានដិតដល់ ហើយជំនាន់នោះមិនទាន់មាន VAR។
ពេលចប់ការប្រកួត Hodge បានដើរទៅសុំដោះដូរអាវជាមួយ Maradona រួចយកមកផ្ញើឲ្យ សារមន្ទីរបាល់ទាត់ជាតិនៅឯអង់គ្លេសរក្សាទុក។ រហូតមកដល់ខែមេសា បុរសវ័យ ៥៩ ឆ្នាំ ក៏សម្រេចប្រកាសបើកឲ្យមានការដេញថ្លៃ ហើយនៅថ្ងៃពុធកន្លងទៅ អាវនោះក៏រកឃើញម្ចាស់ថ្មី តាមរយៈតម្លៃបំបែកកំណត់ត្រាអាវអត្តពលិកថ្លៃបំផុត ៧ ១៤២ ៥០០ ផោន ឬប្រហែលជិត ៩ លានដុល្លារអាមេរិក។ ប្រាក់ទាំងអស់នេះ ល្មមអាចរុញឲ្យបុរសខាងលើ ក្លាយជាសេដ្ឋីប្រាក់លាន ហើយអាចចូលនិវត្តដោយសោយសុខផងដែរ៕
ប្រភព៖ BeSoccer