Liverpool បានឡើងទៅកាន់វគ្គផ្តាច់ព្រ័ត្រ Champions League ជាលើកទី ៣ នៅរយៈពេល ៥ ឆ្នាំចុងក្រោយ បន្ទាប់យកឈ្នះ Villarreal ក្រោមលទ្ធផលសរុប ៥-២។ ក្រុមដឹកនាំដោយលោក Jurgen Klopp កំណត់ត្រូវប៉ះសត្រូវចាស់ជាថ្មី គឺ Real Madrid នៅវេលាម៉ោង ០២:០០ នាទីទាបភ្លឺ ឈានចូលថ្ងៃទី ២៩ ឧសភា មានផ្សាយផ្ទាល់លើទំព័រ CTS Sports។
ងាកទៅខ្សែបម្រើ Thiago Alcantara គេជាកីឡាករតែមួយរូបគត់ ដែលអាចមានឱកាសតាមស្មើកំណត់ត្រាប្រវត្តិសាស្រ្តរបស់ជើងចាស់លោក Clarence Seedorf នោះគឺការលើកពានរង្វាន់ Champions League នៅក្លឹប ៣ ផ្សេងពីគ្នា ក្នុងអាជីពជាកីឡាករ។ កន្លងមក បុរសសញ្ជាតិអេស្ប៉ាញ ធ្លាប់បានឈ្នះជាមួយក្លឹប Barcelona នៅរដូវកាល ២០១០/១១ និងជាមួយ Bayern Munich នៅរដូវកាល ២០១៩/២០។
បញ្ជាក់ថា Seedorf គេធ្លាប់បានឈ្នះពាន UCL កាលនៅ Ajax នារដូវកាល ១៩៩៤/៩៥ ជាមួយ Real Madrid នៅរដូវកាល ១៩៩៧/៩៨ និងជាមួយ AC Milan នៅរដូវកាល ២០០២/០៣ ក៏ដូចជា ២០០៦/០៧។ តែយ៉ាងណាក៏មាន Samuel Eto’o ស្ថិតក្នុងកំណត់ត្រាស្រដៀងគ្នានេះដែរ ពោលជាមួយក្លឹប Real Madrid, Barcelona និង Inter Milan គ្រាន់ថានៅពេលវេលាជាមួយអធិរាជស កីឡាករកាមេរ៉ូន មិនបានឈរជើងលើទីលានសូម្បីមួយនាទីឲ្យក្លឹប នៅការប្រកួតពានខាងលើ៕
ប្រភព៖ Marca