ខ្សែបម្រើ Kevin de Bruyne បានអះអាងថាក្រុម Manchester City ត្រូវតែឈ្នះពានរង្វាន់ UEFA Champions League ទើបអាចបញ្ជាក់ច្បាស់ថាជាក្រុមល្អបំផុតលើលោកបាន។
ក្រុម Manchester City នឹងត្រូវទៅប្រកួតជើងទី២ទល់ក្រុម Real Madrid នៅទឹកដីអេស្ប៉ាញនៅរាត្រីនេះហើយ។ ខណៈដែលជើងទី១កន្លងទៅ ក្រុមរបស់លោក Pep បាននាំមុខលើក្រុម Real Madrid ក្នុងលទ្ធផល ៤-៣ មានប្រៀប១គ្រាប់រូចទៅហើយ។ តែត្រឹមលទ្ធផល១គ្រាប់នេះ ហាក់មិនបានធ្វើឱ្យក្រុម City ទុកចិត្តអ្វីឡើយ ព្រោះក្រុម Real Madrid ជាក្រុមធ្វើបានល្អណាស់ក្នុងពានរង្វាន់ UEFA Champions League ។
មុនការប្រកួតខាងលើចាប់ផ្ដើម ខ្សែបម្រើមិនអាចខ្វះបាន De Bruyne បានបង្ហាញចំណាប់អារម្មណ៍ដែរថា៖ “ខ្ញុំគិតថាបើសិនជាយើងអាចឈ្នះពានរង្វាន់នេះបាន នោះនឹងផ្លាស់ប្ដូរពាក្យសម្ដីរបស់អ្នកខាងក្រៅ។ ពួកគេនឹងគិតថាយើងជាក្រុមល្អមួយនៅលើលោកនេះមិនខាន។ ជាច្រើនឆ្នាំចុងក្រោយនេះ យើងបានឡើងមកដល់កម្រិតកំពូល ហើយឆ្នាំមុនយើងក៏ដល់វគ្គផ្ដាច់ព្រ័ត្រដែរ។ ការឈ្នះពានរង្វាន់នេះ គឺជាអ្វីគ្រប់យ៉ាងដែលយើងចង់បាន”៕ប្រភព៖ DailyMail
