លោក Mino Raiola បានកើតក្នុងប្រទេសអ៊ីតាលី នៅថ្ងៃទី ៤ វិច្ឆិកា ឆ្នាំ ១៩៦៧ ហើយមកទល់ថ្ងៃទី ៣០ មេសា ២០២២ គឺជាពេលវេលាចុងក្រោយ នៃដង្ហើមរបស់លោកលើភពផែនដី។ បុរសវ័យ ៥៤ ឆ្នាំ ត្រូវបានគេទទួលស្គាល់ជាភ្នាក់ងាររត់ការកីឡាករ មានឈ្មោះបោះសំឡេង ហើយក៏ធ្លាប់ឈ្នះពាន នាមភ្នាក់ងារល្អបំផុតប្រចាំឆ្នាំ កាលពីឆ្នាំ ២០១៦ និង ២០២០។
កីឡាករដំបូងបង្អស់ ដែលលោកឈរឈ្មោះតំណាងជាអ្នករត់ការ គឺអតីតវីរបុរសហូឡង់ Dennis Bergkamp គ្រាផ្ទេរចូលក្លឹប Inter Milan។ ក្រោយៗមក លោកបានហែលកាត់ការផ្តល់សេវាកម្មជូនកំពូលកីឡាករជាច្រើន ហើយឥឡូវក្រោយការទទួលមរណៈភាព ក៏ប្រាកដជានឹងធ្វើឲ្យអនាគតតារាឆ្នើមទាំងនោះ មានភាពស្មុគស្មាញជាក់ជាមិនខាន។
តទៅនេះ CTS Sports ធ្វើការបង្ហាញឲ្យស្គាល់ នៅកីឡាករល្បីឈ្មោះ ៥ រូប ដែលស្ថិតក្រោមការគ្រប់គ្រងដោយភ្នាក់ងារលោក Mino Raiola៖
៥) Zlatan Ibrahimovic
Raiola គឺជាអ្នករត់ការ បើកផ្លូវឲ្យខ្សែប្រយុទ្ធស៊ុយអែតផ្ទេរចេញពី Juventus ទៅក្លឹប Inter Milan មុនបោះជំហានទៅក្លឹប Barcelona។ ក្រោយៗមក Zlatan ក៏បានផ្តល់ប្រាក់ភាគលាភជាច្រើនលានដុល្លារផងដែរ ទៅកាន់ភ្នាក់ងារសញ្ជាតិអ៊ីតាលី បន្ទាប់ពីការផ្ទេរទៅ AC Milan, PSG, Man Utd និង LA Galaxy ជាដើម។
៤) Gianluigi Donnarumma
ជាអ្នកចាំទីសញ្ជាតិអ៊ីតាលី ដែលកំពុងមានហាងឆេងថ្លៃខ្លួនខ្ពស់បំផុត ពោលដល់ទៅ ៦៥ លានអឺរ៉ូ។ Raiola ក៏ជាអ្នករត់ការនាំយកបុរសវ័យ ២៣ ឆ្នាំ ចេញពីក្លឹប AC Milan ទៅកាន់ក្លឹប PSG លើកុងត្រារយៈពេល ៥ ឆ្នាំ ជាមួយនឹងប្រាក់ពលកម្មដ៏ច្រើនសន្ធឹក។
៣) Matthijs de Ligt
កាលពីប៉ុន្មានឆ្នាំមុន យុវជនវ័យ ២២ ឆ្នាំ បានប្រែក្លាយជាកីឡាករឆ្នើមនៅក្លឹប Ajax ហើយក៏ទទួលបានការចាប់អារម្មណ៍ ពីសំណាក់ក្លឹបយក្សជាច្រើននៅទូទាំងតំបន់អឺរ៉ុប។ តែយ៉ាងណា Raiola បានរកឃើញកន្លែងដ៏សក្តិសមមួយ សម្រាប់ De Ligt នោះគឺ Juventus នៅតម្លៃផ្តេរ ៨៥,៥ លានអឺរ៉ូ រុញឲ្យគេ ក្លាយឈ្មោះជាខ្សែការពារមានតម្លៃខ្លួនខ្ពស់បំផុតលំដាប់ទី ២ ក្នុងប្រវត្តិសាស្ត្របាល់ទាត់។
២) Paul Pogba
តាមពិតទៅ ការងារចុងក្រោយ និងជាការងារចាំបាច់ របស់ Raiola គឺត្រូវនៅរត់ការរកក្លឹបថ្មី ឲ្យខ្សែបម្រើបារាំង Pogba ដែលត្រៀមក្លាយជាកីឡាករឥតតម្លៃខ្លួន នៅក្រោយថ្ងៃទី ៣០ មិថុនា ឆ្នាំ ២០២២។ Raiola ជាអ្នកនាំយក Pogba មកកាន់ក្លឹប Man Utd នៅតម្លៃកំណត់ត្រា ១២០ លានអឺរ៉ូ តែនៅទីបញ្ចប់ពុំបានក្លាយជាអ្នកនាំគេចាកចេញទៅវិញឡើយ។
១) Erling Haaland
សព្វថ្ងៃ Erling Haaland ជាកីឡាករដែលមានហាងឆេងថ្លៃខ្លួនខ្ពស់បំផុត ដល់ទៅ ១៥០ លានអឺរ៉ូ ហើយគ្រាប់ពេជ្រម្នាក់នេះ ក៏ជាចំណែកស្ថិតក្រោមការរត់ការរបស់លោក Mino Raiola ដូចគ្នា។
លោកបានចរចាសម្រេចការនាំយក Haaland ឲ្យមកក្លាយជាតារារះ នៅក្លឹប Borussia Dortmund ហើយពេលដ៏ខ្លីខាងមុខ តាមថា អាចក្លាយជាកីឡាករស៊ីថ្លៃបំផុតនៅ Premier League ជាមួយប្រាក់ពលកម្មល្បាក់កន្លះលានផោន/សប្តាហ៍ទៀតផង តែសោកស្តាយពេលនេះលែងមានវត្តមាន កំពូលភ្នាក់ងារខាងលើតទៅទៀត ដូច្នេះដំណើរការចរចាក៏ទំនងជាត្រូវផ្អាក ឬប្រហែលត្រូវរកភ្នាក់ងារថ្មី មកចរចាជំនួស៕
ប្រភព៖ បរទេស