ក្លឹប Real Madrid បានយកឈ្នះក្រោមលទ្ធផល ៤-០ ទៅលើ Espanyol នៅការប្រកួតជុំទី ៣៤ នៃក្របខ័ណ្ឌ La Liga។ ការយកបាន ៣ ពិន្ទុ ល្មមអាចកំណត់ឲ្យអធិរាជស ក្លាយជាម្ចាស់ពាន La Liga លើកទី ៣៥ ដ្បិតបើប្រកួតនៅសេសសល់ ៤ ជុំទៀត។ ពានរង្វាន់សារនេះ វាក៏ជាពានលើកទី ២២ ក្នុងអាជីពរបស់អ្នកចាត់ការលោក Carlo Ancelotti ផងដែរ។
ចុះអ្នកមានដឹងទេថា ការលើកពានក្នុងទីក្រុង Madrid យប់មិញ សម្រាប់អ្នកចាត់ការសញ្ជាតិអ៊ីតាលី អាចឈោងបានកំណត់ត្រាខ្នាតយក្ស មិនធ្លាប់កើតមានពីមុនមក? ជាការពិត Ancelotti បានប្រែក្លាយជាអ្នកចាត់ការដំបូងក្នុងលោក ដែលអាចលើកពានរង្វាន់នៅទូទាំងលីគកំពូលទាំង ៥ ជាមួយក្លឹបផ្សេងពីគ្នា៖
៥) លីគកំពូលអេស្ប៉ាញ La Liga
អ្នកចាត់ការវ័យ ៦២ ឆ្នាំ បានដឹកនាំក្លឹប Real Madrid ២ លើក ពោលចន្លោះឆ្នាំ ២០១៣ ដល់ ២០១៥ និង ២០២១ មកទល់សព្វថ្ងៃ។ យ៉ាងណាទើបតែយប់មិញនេះ លោកបានស្គាល់រសជាតិលើកពាន La Liga ជាលើកដំបូង ដែលវាគឺជាបំណែក ក្នុងការបង្គ្រប់កំណត់ត្រាខាងលើ។
មុននេះ Ancelotti ក៏បានហែលកាត់ជោគជ័យរាប់ភ្លេចហើយដែរ ជាមួយក្លឹបមានមូលដ្ឋានក្នុងទីក្រុង Madrid តួយ៉ាង នៅការលើកពាន Copa del Rey, Supercopa de Espana, Champions League, UEFA Super Cup និង FIFA Club World Cup។
៤) លីគកំពូលអ៊ីតាលី Serie A
អ្នកគាំទ្រក្លឹប AC Milan ប្រហែលជាមិនអាចបំភ្លេចបាននោះទេ នូវយុគសម័យចន្លោះឆ្នាំ ២០០១ ដល់ ២០០៩ ដែល Ancelotti ដឹកនាំក្លឹបលើកពានរង្វាន់ដល់ទៅ ៨។ ក្នុងនោះមានដូចជា ពាន Serie A, Coppa Italia, Supercoppa Italiana, Champions League ២ លើក, UEFA Super Cup ២ លើក និង Club World Cup។
មុននោះ លោកក៏ធ្លាប់បានដឹកនាំក្លឹបសេះបង្កង់ Juventus ផងដែរ ពោលបានរយៈពេល ២ ឆ្នាំ គ្រាន់ថាមិនទទួលបានជោគជ័យ ហើយបានលើកតែពានរង្វាន់ UEFA Intertoto Cup ដែលពាននេះ ត្រូវបានសមាគមរំសាយចោល កាលពីឆ្នាំ ២០០៨។
៣) លីគកំពូលបារាំង Ligue 1
នៅអាជីពជាអ្នកចាត់ការជិត ៣០ ឆ្នាំមកនេះ Ancelotti ធ្លាប់បានដឹកនាំក្លឹបនៅបារាំងតែមួយគត់ គឺ Paris Saint-Germain។ លោកចាយពេលត្រឹមមួយឆ្នាំកន្លះ តែក៏អាចលើកពាន Ligue 1 នៅរដូវកាល ២០១២/១៣។
២) លីគកំពូលអង់គ្លេស Premier League
នៅចំណោមក្លឹបអង់គ្លេស ២ ដែល Ancelotti បានដឹកនាំ គឺមាន Chelsea ជាទ្រនំជោគជ័យ ដោយចាយពេលជិត ២ ឆ្នាំ លើកបានពានរង្វាន់ ៣ មាន FA Cup, Community Shield និង Premier League។
១) លីគកំពូលអាល្លឺម៉ង់ Bundesliga
ជាមួយក្លឹបនៅឯអាល្លឺម៉ង់ Ancelotti បានទៅដឹកនាំជាងមួយឆ្នាំដែរ រួចលើកពានដល់ទៅ ៣។ ក្រោយការចាកចេញរបស់ Pep Guardiola គឺបានបុរសសញ្ជាតិអ៊ីតាលីនេះហើយ ជាអ្នកចូលជំនួស ដោយមកដល់ភ្លាម លើកពាន DFL-Super Cup មុនបើករដូវកាលមួយភ្លែត លុះដល់បញ្ចប់រដូវកាល ក៏លើកបានពានលីគកំពូល Bundesliga ថែមទៀត។ មុនការចាកចេញ Ancelotti បានលើកពាន DFL សារជាថ្មីមួយគ្រឿងបន្ថែម៕
ប្រភព៖ បរទេស