ក្លឹប Real Madrid បានយកឈ្នះ ៤-០ ទៅលើ Espanyol នៅជុំទី ៣៤ ហើយវាក៏ល្មមអាចឲ្យក្លឹប ក្លាយជាម្ចាស់ពានមុនបញ្ចប់រដូវកាល។ នេះជាជ័យជម្នះពានលីគកំពូលអេស្ប៉ាញ La Liga លើកទី ៣៥ នៅប្រវត្តិសាស្រ្តក្លឹប។
យ៉ាងណាខាងក្លឹបគូប្រជែង Barcelona ក៏បានផ្ញើសារអបអរដល់ក្លឹបអធិរាជសផងដែរ តែជាសារលក្ខណៈសាមញ្ញ មិនបានលាយឡំការប្រើប្រាស់ Emoji អ្វីច្រើនឡើយ។ វារាប់ថាជារឿងគួរឲ្យគោរពមួយហើយ ដ្បិតបើក្លឹបទាំងពីរ ជាក្លឹបគូប្រជែងស៊ីសាច់ហុតឈាមគ្នានៅលីគកំពូលនៃប្រទេសអេស្ប៉ាញ។
គណនីផ្លូវការក្លឹបនៅតំបន់កាតាឡូញ៉ាសរសេរថា៖ “FC Barcelona សូមចូលរួមអបអរដល់ក្លឹប Real Madrid នូវការឈ្នះពាន La Liga លើកទី ៣៥”។ បន្ទាប់ឃើញសារនោះ ទាំងអ្នកគាំទ្រ Real Madrid និង Barcelona ក៏បានចូលទៅបញ្ចេញមតិ ខ្លះក៏មើលទៅល្អ ខ្លះមើលទៅឌឺដងគ្នា ដូចតែការបង្ហោះមុនៗអ៊ីចឹង។ រំឭកថា ក្រុមដឹកនាំដោយលោក Xavi Hernandez នៅសល់ ៥ ជុំក្នុងដៃ ហើយកំពុងឈរលេខ ៣ មាន ៦៣ ពិន្ទុ នេះគោលដៅពួកគេចង់ប្រជែងយកឈ្នះ Sevilla នៅតំណែង Top 2 កំពុងមាន ៦៤ ពិន្ទុ នៅជុំទី ៣៤ ដើម្បីបានប្រាក់រង្វាន់កាន់តែច្រើន៕
ប្រភព៖ Twitter