លោក Erik ten Hag កំណត់នឹងចូលមកដឹកនាំក្លឹប Manchester United ចាប់ពីថ្ងៃទី ១ កក្កដា ឆ្នាំ ២០២២ តទៅ ដោយមានការជឿជាក់ថា ការរុះរើប្រព័ន្ធកីឡាករក៏នឹងកើតមាន ហើយអ្នកចាកចេញក៏ទំនងមានច្រើន ដូចគ្នាទៅនឹងសមាជិកថ្មី ដែលត្រូវមកចុះចូល។ យ៉ាងណាបើតាមការយល់ឃើញរបស់អតីតជើងចាស់លោក Tomasz Kuszczak បានលើកឡើងថា មានតែកីឡាករ Man Utd ២ រូបប៉ុណ្ណោះ ដែលអាចធានាសុវត្ថិភាព ក្រោយគ្រូសញ្ជាតិហូឡង់មកដឹកនាំ។
ជាការពិតដូចអនាគត Nemanja Matic, Jesse Lingard, Paul Pogba និងសូម្បីតែ Cristiano Ronaldo ក៏គ្មាននរណាអាចមើលដឹងជាមុនដែរ ថាត្រូវបានគ្រូវ័យ ៥២ ឆ្នាំ គិតចង់វ៉ៃចេញ ឬរក្សាទុក។ ក៏ប៉ុន្តែបើនិយាយអំពីអ្នកចាំទីដៃទី ១&២ គឺ David de Gea និង Dean Henderson ត្រូវបានគេមើលឃើញថា នឹងអាចបន្តនៅជាក់ជាមិនខាន។
អតីតកីឡាករលេងឲ្យក្លឹប Man Utd ចន្លោះឆ្នាំ ២០០៦ ដល់ ២០១២ ខាងលើនិយាយ៖ “ខ្ញុំគិតថានឹងមានការផ្លាស់ប្តូរច្រើនខ្លាំងណាស់ តែវាក៏ល្អ ព្រោះខ្ញុំចង់ឃើញក្រុមមួយនេះ លេងនៅកម្រិតដ៏ត្រឹមត្រូវ និងមិនចង់ឲ្យរបូតគ្រាប់បាល់ច្រើនដូចពេលប៉ះ Liverpool ពីរប្រកួត របូត ៩ គ្រាប់ទៀតនោះឡើយ”។
លោកបន្ត៖ “នឹងមានការភ្ញាក់ផ្អើល គ្រប់តំណែងទាំងអស់លើកលែងតែអ្នកចាំទី ដោយ David និង Dean គេរឹងមាំ នឹងមិនប៉ះពាល់អ្វីទេ មានតែពីររូបហ្នឹងទេ ធានាសុវត្ថិភាពបាន សល់ពីហ្នឹង ដូច Ronaldo គេមានវ័យចំណាស់ គេមិនអាចទទួលខុសត្រូវច្រើនដូចមុនទេ ដូច្នេះគ្រប់យ៉ាងនឹងមានការផ្លាស់ប្តូរជាចាំបាច់”៕
ប្រភព៖ Daily Mail