កីឡាករ Playmaker ឲ្យក្លឹប Real Sociedad គឺ David Silva បានសម្រេចទទួលបានកិច្ចព្រមព្រៀងកុងត្រាថ្មីជាផ្លូវការ ពីសំណាក់ក្លឹបអាណាព្យាបាល Real Sociedad។ ដើមឡើយកុងត្រាគេកំណត់ត្រូវផុតនៅបញ្ចប់រដូវកាលខាងមុខ ពោលគឺចុងខែមិថុនា ឆ្នាំ ២០២២ ឥឡូវបន្តថ្មី ថែម ១២ ខែទៀត។
បុរសវ័យ ៣៦ ឆ្នាំ នឹងឈានចូលរដូវកាលទី ៣ ជាមួយក្លឹបនៅទឹកដីអេស្ប៉ាញ ក្រោយចែកផ្លូវពីក្លឹបជោគជ័យ Manchester City កាលពីឆ្នាំ ២០២០។ ខ្សែបម្រើខាងលើ ក៏ជាចំណែកសំខាន់បានជួយក្លឹបយកឈ្នះ Athletic Bilbao លើកពានរង្វាន់ Copa del Rey កាលពីឆ្នាំទៅ ក្រោយខកខានតាំងពីឆ្នាំ ១៩៨៧។ ស្ថិតិរដូវកាលនេះ បង្ហាញខ្លួន ២៩ ប្រកួត រកបាន ១ គ្រាប់និង Assist ៤ លើកឲ្យក្លឹប។
និយាយជុំវិញការបន្តកុងត្រាថ្មី Silva ថា៖ “ខ្ញុំពិតជារីករាយណាស់ ការពិតទៅខ្ញុំទទួលបានពេលវេលាដ៏ល្អនៅទីនេះ ២ ឆ្នាំកន្លងមក ហើយឥឡូវសង្ឃឹមថានឹងបន្តល្អថែមទៀត ដោយមុនចុះកុងត្រាថ្មីនេះ ខ្ញុំបានគិតរួចរាល់ ខ្ញុំមើលឃើញ Sociedad ជាក្លឹបដ៏ល្អ ជាក្លឹបមានការអភិវឌ្ឍ ហើយនឹងតែងតែប្រកួតប្រជែងជាមួយបណ្តាក្លឹបនៅអឺរ៉ុបជារៀងរាល់ឆ្នាំ”។ បញ្ជាក់ថាក្លឹប កំពុងឈរលេខ ៦ នៅតារាង La Liga ដល់សេសសល់ ៥ ជុំទៀត។ ពួកគេនៅតែមានឱកាសអាចប្រជែងតំណែង Top 4 ឬយ៉ាងហោច Top 6 ដើម្បីលេងពាន UCL ឬ UEL នៅរដូវកាល ២០២២/២៣៕
ប្រភព៖ DailyMail