នៅសេសសល់តែ ៦ ជុំទៀតប៉ុណ្ណោះ នឹងសម្រេចច្បាស់ហើយថាក្រុមណានឹងក្លាយជាម្ចាស់ជើងឯកលីគកំពូលអង់គ្លេស ហើយក្រុមណាខ្លះទៀត ដែលនឹងត្រូវធ្លាក់ចេញទៅកាន់លីគលំដាប់ទីពីរ? គិតត្រឹមពេលនេះ ៣ ក្រុមប្រឈមខ្ពស់ មានដូចជា Everton, Watford និង Norwich City។
គេកំពុងមានការភ្ញាក់ផ្អើលខ្លាំង ព្រោះក្លឹបមានមូលដ្ឋានក្នុងទីក្រុង Merseyside ធ្លាប់តែធ្វើបានល្អ ទោះធ្លាក់ជើងខ្លាំង ក៏ឈរនៅចំណាត់ថ្នាក់ល្បាក់លេខ ១០ អីដែរ ដល់តែរដូវកាលនេះ មកឡុងចុងប្រឈមខ្ពស់នឹងត្រូវកាត់ឈ្មោះចេញពីតារាង។ ក្រុមដឹកនាំដោយលោក Frank Lampard មាន ២៩ ពិន្ទុ គិតត្រឹមជុំទី ៣២ ហើយចុងសប្តាហ៍នេះ ត្រូវប៉ះគីឡូធ្ងន់ Chelsea ថែមទៀត។
បើបន្តចាញ់ នោះ Everton នឹងកាន់តែប្រឈមខ្ពស់ហើយ ក្នុងការធ្លាក់ចេញពី PL។ លើកចុងក្រោយដែលក្លឹបម្ចាស់ដី Goodison Park ខកខានលេងនៅ Premier League គឺនៅឆ្នាំ ១៩៥៤ ពោលគឺមានរយៈពេល ៦៨ ឆ្នាំមកហើយ។ ក្នុងប្រវត្តិសាស្រ្តក្លឹបមួយនេះ ធ្លាប់លើកពានលីគកំពូលអង់គ្លេស ៩ លើក ដោយលើកចុងក្រោយនៅរដូវកាល ១៩៨៦/៨៧៕
ប្រភព៖ Sportsmole