ខណៈដែលសុពលភាពកុងត្រា ត្រូវផុតនៅចុងខែមិថុនា ឆ្នាំ ២០២៣ ក៏ជាហេតុនាំឲ្យក្លឹបអាណាព្យាបាល Bayern Munich បានព្យាយាមរិះរកគ្រប់វិធី ដើម្បីសម្រេចការចរចាកុងត្រាថ្មី រវាងភាគីកីឡាករ Robert Lewandowski ឲ្យបានមុនបញ្ចប់រដូវកាល។ ឥឡូវក៏ស្រាប់តែទទួលបានចម្លើយហើយ នោះគឺ បដិសេធ មិនព្រមចុះហត្ថលេខាកុងត្រាថ្មីទេ រួចក៏បានជូនដំណឹងទៅថ្នាក់លើអំពីទ្រនំដែលគេចង់ទៅចូលរួមនាពេលបន្ទាប់ផងដែរ។
បញ្ជាក់បន្តិច កីឡាករប៉ូឡូញ នៅរដូវកាល ២០២១/២២ នៅតែបន្តធ្វើបានល្អឲ្យក្លឹបអាល្លឺម៉ង់ Bayern ដោយបង្ហាញខ្លួន ៤០ ប្រកួត អាចរកបានដល់ទៅ ៤៦ គ្រាប់និង Assist ៤ លើកឯណោះ។ តែយ៉ាងណា Lewandowski ហាក់មិនចង់បន្តឈរជើងនៅក្របខ័ណ្ឌ Bundesliga តទៅទៀតឡើយ ពោលគឺចង់ឆ្ពោះទៅរកការប្រកួតប្រជែងថ្មី នៅឯក្របខ័ណ្ឌកំពូលអេស្ប៉ាញ La Liga។
បើតាមសារព័ត៌មាន TVP Sport ចុះផ្សាយថា បុរសវ័យ ៣៣ ឆ្នាំ បានជូនដំណឹងទៅកាន់នាយកប្រតិបត្តិ ឬ CEO ក្លឹប លោក Oliver Kahn រួចជាស្រេច ថាគ្មានបំណងចង់ទម្លាក់ចុងប៊ិចលើកុងត្រាថ្មី ឲ្យលើសពីរដូវកាល ២០២២/២៣ ឡើយ។ លើសពីនេះ កីឡាករក៏បានព្រមព្រៀងរួចរាល់ហើយដែរ នូវកិច្ចព្រមព្រៀងផ្ទាល់មាត់ ជាមួយក្លឹបយក្សអេស្ប៉ាញ Barcelona ហើយបើអាចទៅរួច គឺចង់សម្រេចការផ្ទេរ នៅទីផ្សារដោះដូររដូវក្តៅខាងមុខ។
យើងក៏មិនទាន់ច្បាស់ថា ក្លឹបដឹកនាំដោយលោក Xavi Hernandez នឹងព្រមផ្តល់ឲ្យនូវតម្លៃផ្ទេរ ល្បាក់ ៥០ លានអឺរ៉ូ ទៅកាន់ Bayern ដើម្បីនាំយក Lewandowski ត្រឹមបញ្ចប់រដូវកាលខាងមុខ ឬម្យ៉ាងទៀត អាចស៊ូអូសបន្លាយពេល រង់ចាំដល់គេក្លាយជាកីឡាករឥតតម្លៃផ្ទេរ នៅរដូវកាលក្រោយ។ រំឭកឲ្យដឹង កីឡាករប៉ូឡូញ អាចរកបាន ៣៥០ ០០០ ផោន/សប្តាហ៍នៅក្លឹបអាល្លឺម៉ង់ តែទំហំនេះ ជឿថា អាចនឹងមានការកើនឡើងបន្ថែមទៀត ក្រោយផ្ទេរទៅក្លឹប Barcelona ជាពិសេសប្រសិនជាការផ្ទេរនៅលក្ខខណ្ឌឥតតម្លៃខ្លួន។
បង្វែរទៅរឿងគួរឲ្យចាប់អារម្មណ៍មួយផ្សេងទៀត ក្លឹបយក្ស ៣ នៅតំបន់អឺរ៉ុប កំពុងសកម្មក្នុងការប្រជែងគ្នា ចង់បានខ្សែប្រយុទ្ធឆ្នើមរបស់ក្លឹប Benfica គឺកីឡាករ Darwin Nunez។ សម្រាប់យុវជនវ័យ ២២ ឆ្នាំ នៅការបង្ហាញខ្លួន ៣៦ ប្រកួត គេអាចរកបានដល់ទៅ ៣១ គ្រាប់និង Assist ៣ លើក នេះបូកទាំង ៥ គ្រាប់នៅ UCL ផងដែរ។
បើតាមសារព័ត៌មាន The Athletic ចុះផ្សាយថា ក្លឹប Man Utd, Chelsea និងក្លឹប PSG បានតាមក្រវែលមើល និងចូលចែចូវជាបណ្តើរៗហើយ អំពីលទ្ធភាពក្នុងការនាំយកកីឡាករអ៊ុយរុយហ្គាយ នៅទីផ្សារដោះដូររដូវក្តៅ។
ប្រភពបានឲ្យដឹងទៀតថា ខាងក្លឹបអាណាព្យាបាល Benfica ដាក់តម្លៃយ៉ាងហោចណាស់ ៧០ លានអឺរ៉ូ ទើបព្រមអនុញ្ញាតឲ្យ Nunez ចាកចេញទៅ។ ក៏ប៉ុន្តែអ្នកចាត់ការលោក Nelson Verissimo ក៏ធ្លាប់បង្ហើបហើយដែរ ថាបើក្លឹបចង់បាន នៅអូសបន្លាយពេល នោះតម្លៃរបស់កីឡាករអ៊ុយរុយហ្គាយអាចនឹងឡើងដល់ប្រហែលតម្លៃ “Ronaldo ទីពីរ” គឺ Joao Felix ល្បាក់ ១៣៥ លានអឺរ៉ូក៏ថាបាន។ បញ្ជាក់ថា សុពលភាពកុងត្រារបស់អតីតយុវជននៅក្លឹប Penarol នឹងត្រូវផុតនៅចុងខែមិថុនា ឆ្នាំ ២០២៥៕
ប្រភព៖ បរទេស