Ancelotti ថា​ក្រុម​របស់​ខ្លួន​នឹង​ប្រឹង​ដល់​ទី​បញ្ចប់ ហើយ​អត់​អាច​មើល​ស្រាល Chelsea បាន​ទេ

ដ្បិត​បើ​យក​ឈ្នះ ៣-១ ​ទៅ​លើ​ក្លឹប Chelsea កាល​ពី​ជើង​ទី ១ រួច​ទៅ​ហើយ​នោះ ក៏​អ្នកចាត់ការ​នៃ​ក្លឹប Real Madrid លោក Carlo Ancelotti នៅ​តែ​បំផុស​ទឹក​ចិត្ត​កីឡាករ​ក្នុង​ក្រុម ឲ្យ​មាន​ការ​ខិតខំ​ខ្ពស់ ហើយ​មិន​អាច​មើល​ស្រាល​ក្រុម​គូ​ប្រជែង​បាន​ទេ ព្រោះ​នេះ គឺ​ជា​តោ​ខៀវ ជា​ក្លឹប​ខ្លាំង ដែល​ទើប​លើក​ពាន​រង្វាន់​អឺរ៉ុប​រដូវ​កាល​មុន។

ក្រុម​ទាំង​ពីរ​នឹង​ត្រូវ​កំណត់​ប៉ះ​គ្នា​ជា​ថ្មី នៅ​វេលា​ម៉ោង ០២:០០ នាទី​ទាប​ភ្លឺ​យប់​នេះ ហើយ​ប្រសិន​លទ្ធផល Chelsea មិន​អាច​យក​ឈ្នះ​ដាច់​ ២ គ្រាប់​ទេ​នោះ ការ​ប្រកួត​នឹង​ត្រូវ​បញ្ចប់ ហើយ​កំណត់​ឲ្យ Real ជា​ក្រុម​អាច​ឡើង​ទៅ​វគ្គ​ពាក់​កណ្តាល​ផ្តាច់ព្រ័ត្រ ត្រូវ​ជួប​រវាង Man City ឬ Atletico Madrid។

លោក Ancelotti និយាយ​បែប​នេះ៖ “វា​នឹង​ក្លាយ​ជា​ការ​ប្រកួត​ដ៏​តានតឹង​មួយ​សម្រាប់​ពួក​គេ តែ​ជឿ​ថា Chelsea នឹង​មិន​បោះបង់​ទេ ដោយ​ខ្ញុំ​យល់​ពី​កីឡាករ​ខ្ញុំ​ច្បាស់ ពួក​គេ​នឹង​បញ្ចៀស​មិន​ចង់​ឲ្យ​កើត​មាន​លទ្ធផល​ដូច​កាល​ទល់ Barca ហើយ​យល់​អំពី​តម្រូវ​ការ​នៃ​ប្រកួត​ថ្ងៃ​ស្អែក និយាយ​ទៅ​យើង​នឹង​មិន​មើល​ស្រាល​ក្រុម​ណា​មួយ​ឡើយ”។

លោក​បន្ត៖ “គ្រាន់​ថា​នេះ​ជា​ឱកាស​ល្អ​សម្រាប់​ពួក​យើង ក្នុង​ការ​ដែល​អាច​ឡើង​ទៅ​វគ្គ ៤ ក្រុម តែ​ត្រូវ​ចាំ Chelsea ជា​ក្រុម​ខ្លាំង យើង​ត្រូវ​គោរព​ពួក​គេ ត្រូវ​រៀបចំ​ការ​ប្រកួត​ឲ្យ​បាន​ល្អ រួច​ត្រូវ​ដឹង​ថា​ពួក​គេ​នឹង​កាន់​តែ​ល្អ​ជាង​មុន​ថែម​ទៀត”៕ ប្រភព៖ BeSoccer

ភ្ជាប់ទំនាក់ទំនងជាមួយ CTS SPORT