Salah មាន​ឱកាស​បំបែក​កំណត់ត្រា​ខ្នាត​យក្ស​មួយ បើ​រក​បាន​គ្រាប់​បាល់​ទល់ Benfica ជើង​ទី ២

នៅ​ការ​ប្រកួត​ជើង​ទី ១ ខាង​ Liverpool បាន​យក​ឈ្នះ ៣-១ នៅ​ឯ​ទឹកដី​ព័រទុយហ្គាល់ ឥឡូវ​ចូល​មក​ដល់​ជើង​ទី ២ ដែល​កំណត់​ជួប​គ្នា​នៅ Anfield នា​វេលា​ម៉ោង ០២:០០ នាទី​ទាប​ភ្លឺ ឈាន​ចូល​ថ្ងៃ​ទី ១៤ មេសា មាន​ផ្សាយ​ផ្ទាល់​លើ​ទំព័រ CTS Sports។ ប្រកួត​នេះ សម្រាប់​ខ្សែ​ប្រយុទ្ធ​អេហ្សីប Mohamed Salah ក៏​មាន​ឱកាស​បំបែក​កំណត់ត្រា​ខ្នាត​យក្ស​មួយ​ផង​ដែរ។

នោះ​គឺ ការ​រក​បាន​គ្រាប់​បាល់​ច្រើន​បំផុត​នៅ UEFA Champions League ឲ្យ​ក្លឹប​ហង្ស​ក្រហម Liverpool។ បច្ចុប្បន្ន Salah មាន ១៤ គ្រាប់ នៅ​ការ​លេង ២៣ ប្រកួត​សរុប វា​ជា​តួ​លេខ​ស្មើ​នឹង​កំណត់ត្រា​អ្នក​គ្រោង​ចាស់​គឺ Steven Gerrard ដែល​មាន ១៤ គ្រាប់​ស្មើ។ ដូច្នេះ​ហើយ​កីឡាករ​វ័យ ២៩ ឆ្នាំ​ត្រូវ​ការ​តែ​មួយ​គ្រាប់​ទៀត​ប៉ុណ្ណោះ នោះ​នឹង​អាច​ក្លាយ​ឈ្មោះ​ជា Top Scorer ប្រចាំ Liverpool នៅ UCL បាន​ហើយ។

គ្រាប់​បាល់​ចុង​ក្រោយ​របស់ Salah នៅ UCL គឺ​កើត​ឡើង​តាំង​ពី​ខែ​វិច្ឆិកា នា​វគ្គ​ចែក​ពូល​ឯ​ណោះ គ្រា​យក​ឈ្នះ ២-០ ទោ​លើ Porto។ អ៊ីចឹង​ចាំ​មើល​សារ​នេះ តើ​បុរស​សញ្ជាតិ​អេហ្សីប​អាច​បង្កើត​គ្រាប់​បាល់​ថ្មី ដើម្បី​ឈោង​យក​កំណត់ត្រា​ខាង​លើ​ដែរ​ឬ​ទេ? បញ្ជាក់​ថា សុពលភាព​កុងត្រា​របស់ Salah នៅ​ក្លឹប​ម្ចាស់ដី Anfield សេសសល់​ដល់​ចុង​ខែ​មិថុនា ឆ្នាំ ២០២៣៕

ប្រភព៖ Sportsmole

ភ្ជាប់ទំនាក់ទំនងជាមួយ CTS SPORT