វាជាក្តីស្រមៃសម្រាប់កីឡាករបាល់ទាត់ភាគច្រើន ក្នុងការចង់ទៅសាងអាជីពនៅក្លឹបអ្នកមានបុណ្យ Barcelona។ នេះជាក្លឹបដែលមានអាយុកាល ១២២ ឆ្នាំមកហើយ រួចបើនិយាយពីសមិទ្ធផលជោគជ័យ គឺរាប់ភ្លេច ទាំងពានរង្វាន់ក្នុងនិងក្រៅលីគកំពូល។
តែយ៉ាងណាក៏មិនប្រាកដថាគ្រប់គ្នា សុទ្ធតែចាប់អារម្មណ៍ខ្វាករចង់ផ្ទេរទៅក្លឹបនៅតំបន់កាតាឡូញ៉ាមួយនេះដែរ ជាក់ស្តែងដូចកីឡាករកំពូលទាំង ៥ រូបខាងក្រោម ដែលទទួលបានឱកាសហើយ តែបែរជាបដិសេធទាំងមិនស្ទាក់ស្ទើរ៖
៥) Alessandro del Piero
ជាវីរបុរសចាយពេល ១៩ ឆ្នាំ នៅក្លឹប Juventus ហើយក៏រាប់បានជាកីឡាករអ៊ីតាលីដ៏ជោគជ័យមួយផងដែរ។ កាលពីឆ្នាំ ២០១២ ភ្នាក់ងាររបស់អតីតខ្សែប្រយុទ្ធខាងលើ ក៏បានទម្លាយថា Barcelona ធ្លាប់ចាប់អារម្មណ៍ចង់បាន del Piero ទៅចូលរួម។
លោក Claudio Pasqualin និយាយ៖ “Del Piero គេស្ថិតនៅក្លឹប Juventus ហើយកំឡុងពេលគេឡើងជើងខ្លាំង គេក៏ទទួលបានសំណើពីក្លឹបយក្ស Man Utd និង Barcelona ផងដែរ តែគេបដិសេធ ក្រោមហេតុផល បន្តឈរជើង ដោយសារទំហំចិត្តស្រលាញ់ក្លឹបអ៊ីតាលីជាខ្លាំង”។
៤) Koke
នៅរដូវកាល ២០១៣/១៤ ដែល Atletico Madrid បានឈ្នះពាន La Liga ក៏គួរអរគុណទៅដល់ចំណែកសំខាន់នៃខ្សែប្រយុទ្ធ Diego Costa និងខ្សែបម្រើ Koke។ នៅពេលវេលានោះ ក្លឹបរួមលីគ Barcelona ក៏បានបាក់ចិត្តមកលើកីឡាករអេស្ប៉ាញផងដែរ។
ក្រុមអ្នកឃ្លាំមើលកីឡាកររបស់អ្នកមានបុណ្យ បានមកតាមក្រវែលមើល Koke ព្រោះចង់បានគេ មករួបរួមនៅផែនការណ៍យូរអង្វែង ជាមួយការដឹកនាំរបស់លោក Luis Enrique ក៏ប៉ុន្តែកីឡាករបានបដិសេធ។ នៅឆ្នាំ ២០១៤ Koke និយាយ៖ “ជាការពិត វាពិតជាពិបាកក្នុងការនិយាយថា ទេ ទៅកាន់ក្លឹប Barcelona ក៏ប៉ុន្តែចិត្តរបស់ខ្ញុំ គឺនៅតែចង់បន្តច្រើនឆ្នាំទៀតជាមួយ Atletico នេះដូចជាផ្ទះរបស់ខ្ញុំ ហើយក៏ទទួលអារម្មណ៍ថាក្លឹបនៅត្រូវការខ្ញុំ និងមិនចង់លក់ខ្ញុំចេញឡើយ”។
៣) Thiago Silva
ខ្សែការពារកណ្តាលសញ្ជាតិប្រេស៊ីល ក៏បានបដិសេធសំណើ Barcelona ដើម្បីមកចាយលុយធំ នៅក្លឹបសេដ្ឋី PSG។ នៅបទសម្ភាសន៍មួយ Silva ធ្លាប់និយាយ៖ “ជារឿងដ៏លំបាក ការដែលបដិសេធម្តងហើយម្តងទៀត ទៅកាន់ Barcelona ទាំងដែលកាលពីក្មេង ខ្ញុំធ្លាប់ស្រមៃថាចង់ទៅលេងនៅទីនោះ ក៏ប៉ុន្តែជីវិតរបស់យើង ពេលខ្លះវាបែបហ្នឹង វាទាមទារឲ្យយើងត្រូវតែដើរផ្ទុយពីក្តីស្រមៃខ្លួនឯង”។
២) Gianluigi Buffon
ជាអ្នកចាំទីដែលមានតម្លៃផ្ទេរខ្ពស់បំផុតកាលពីឆ្នាំ ២០០១ ដោយត្រូវបាន Juventus ចាយលុយ ៣៩ លានផោន នាំយកពីក្លឹប Parma។ ពេលវេលានោះ ក៏គេទទួលបានសំណើពី Barcelona ផងដែរ តែចម្លើយ គឺបានបដិសេធ។
Buffon និយាយ៖ “ខ្ញុំប៊ិះតែនឹងផ្ទេរទៅ Barcelona នៅឆ្នាំ ២០០១ តែយ៉ាងណាក្រោយពិភាក្សាជាមួយឪពុក ខ្ញុំក៏ជ្រើសយក Juventus ហើយរីករាយនឹងការសម្រេចចិត្តនេះ”។
១) Cristiano Ronaldo
អតីតប្រធានក្លឹប Real Madrid លោក Roman Calderon ធ្លាប់និយាយអំពីការដែល Ronaldo បដិសេធសំណើ Barcelona បែបនេះថា៖ “នៅពេលគេត្រៀមចាកចេញពី Man Utd គឺ Barcelona បានព្យាយាមណាស់ ក្នុងការទាក់ទងទៅកាន់កីឡាករព័រទុយហ្គាល់ ក៏ប៉ុន្តែគេបាននិយាយច្បាស់ៗ ថានឹងមិនទៅក្លឹបដទៃណាទាំងអស់ ក្រៅតែពី Real Madrid”។
លោកបន្ត៖ “ហេតុផលហ្នឹងហើយ ទើបយើងឈានដល់ការសម្រេចកិច្ចព្រមព្រៀង យកបាន Ronaldo នៅតម្លៃ ៨០ លានផោន ហើយនេះគឺជា Cristiano ដែលមិនបានសម្លឹងលុយជាធំ តែសម្លឹងលើភាពជោគជ័យ”៕
ប្រភព៖ បរទេស