នៅប៉ុន្មានឆ្នាំចុងក្រោយ អ្នកគាំទ្របានចាប់អារម្មណ៍ទៅលើបណ្តុំយុវជនជាច្រើន ហើយក្នុងចំណោមនោះក៏មាន Alphonso Davies ដែលគេចាប់ផ្ដើមលេចធ្លោខ្លាំង នៅរដូវកាល ២០២០/២១ គ្រា Bayern ក្លាយជាម្ចាស់ជើងឯក Champions League។ ក្រៅពីដឹងថាគេជាខ្សែការពារឆ្នើម និងទើបជាចំណែកជួយកាណាដាបានកៅអីទៅលេង World Cup ក៏ជឿថា មនុស្សភាគច្រើនប្រហែលពុំបានដឹងពី ៣ ចំណុចខាងក្រោមនេះទេ៖
១) ជម្រើសជាតិដែលគេអាចទៅចូលរួម
កីឡាករវ័យ ២១ ឆ្នាំ បានបង្ហាញខ្លួនឲ្យជម្រើសជាតិកាណាដាជាលើកដំបូងនៅថ្ងៃទី ១៤ កក្កដា ឆ្នាំ ២០១៧ ហើយគិតមកទល់ពេលនេះ ឆ្លងកាត់ ៣០ ប្រកួត និងរកបាន ១០ គ្រាប់ហើយ។ យ៉ាងណាក្នុងជម្រើសពីដើមមក គឺមានសិទ្ធជ្រើសរើសដល់ទៅ ៣ ប្រទេសឯណោះ។
ក្រៅពីកាណាដា ខ្សែការពារស្លាបឆ្វេង ក៏ធ្លាប់មានសិទ្ធជ្រើសទៅចូលរួមឲ្យជម្រើសជាតិលីបេរីយ៉ា ជាប្រទេសកំណើតនៃឪពុកម្តាយរបស់គេ ក៏ដូចជាជម្រើសជាតិមួយផ្សេងទៀតគឺហ្គាណា ជាកន្លែងដែលឪពុកម្តាយធ្លាប់ទៅរស់នៅដល់បានសញ្ជាតិប៉ុន្មានឆ្នាំ កំឡុងពេលរត់គេចពីសង្រ្គាម។
២) រត់លឿនបំផុតនៅ Bundesliga
ជំនាន់ពីរឆ្នាំមុន គេល្បី Davies ខ្លាំង ត្រង់ការប្រើប្រាស់ល្បឿនលឿនដូចរន្ទះ ហើយក៏ធ្លាប់ជាប់ឈ្មោះជាកីឡាកររត់លឿនបំផុតនៅប្រវត្តិសាស្ត្រលីគកំពូលអាល្លឺម៉ង់ Bundesliga។ នៅខែមិថុនា ឆ្នាំ ២០២០ ជាការប្រកួតទល់ក្លឹប Werder Breman កីឡាករសញ្ជាតិកាណាដា អាចរត់បានដល់ល្បឿន ៣៦,៥១ គ.ម/ម៉។
៣) កីឡាករក្នុងដួងចិត្ត
មុនកើតមានលទ្ធផល ៨-២ រវាង Bayern-Barcelona ក្នុងដួងចិត្តរបស់ Davies គឺបានស្រលាញ់គាំទ្រ Lionel Messi តាំងពីដើមមកម្ល៉េះ។ យុវជនខាងលើ ធ្លាប់និយាយអំពីតារាឆ្នើមអាហ្សង់ទីនបែបនេះ៖ “វាជារឿងដ៏អស្ចារ្យ ការដែលអាចលេងនៅ Champions League ទល់កីឡាករដែលខ្ញុំស្រលាញ់បំផុតក្នុងលោក”។ Davies ថែមទាំងយករូបភាពដែល Messi ហុចដៃជួយលើកគេមកបិទក្នុងបន្ទប់ទៀតផង រួចនិយាយថា៖ “ពេលនោះ Messi គាត់ធ្វើឲ្យខ្ញុំដួល ហើយគាត់ហុចដៃលើកខ្ញុំឡើងវិញ រូបភាពមួយសន្លឹកនេះ នឹងនៅជាមួយខ្ញុំរហូតទៅ”។
៤) មិត្តស្រីរបស់ Davies
ក៏ជាកីឡាការនីបាល់ទាត់ មានឈ្មោះ Jordyn Huitema ហើយកាលពីឆ្នាំ ២០២០ ពួកគេប៊ិះតែនឹងក្លាយជាដៃគូស្នេហាដំបូងក្នុងប្រវត្តិសាស្រ្តបាល់ទាត់ អាចលើកពាន UCL ផ្នែកបុរស&នារីនៅឆ្នាំតែមួយ។ សោកស្តាយ PSG ផ្នែកនារី ធ្លាក់ត្រឹមវគ្គ ៤ ក្រុម ហើយ Barcelona ឯណោះ ដែលក្លាយជាម្ចាស់ពាន នៅកំឡុងពេលដែល Bayern Munich ឈ្នះ ផ្នែកបុរស។
នាងមានអាយុប្អូន Davies មួយឆ្នាំ ហើយនិយាយអំពីទំនាក់ទំនងគឺស្អិតរមួត និងតែងតែបង្ហាញពីភាពផ្អែមល្ហែមលើបណ្តាញសង្គម។ គិតមកទល់ពេលនេះ ពួកគេទាក់ទងគ្នាជាង ៥ ឆ្នាំហើយ រួចក៏ធ្លាប់បានបង្ហើបអំពីគម្រោងជីវិតវែងឆ្ងាយទៅមុខផងដែរ៕
ប្រភព៖ បរទេស