កាលពីថ្ងៃសៅរ៍កន្លងទៅនេះ ក្លឹបអ៊ុយក្រែន Shakhtar Donetsk អាចមានឱកាសបើកការប្រកួតជាលើកដំបូងនៅឆ្នាំ ២០២២ ដែលវាជាមួយក្នុងចំណោមប្រកួត ៤ នៅគោលបំណងរៃអង្គាសថវិកាជួយដល់ជនភៀសខ្លួន និងអ្នកដែលរងផលប៉ះពាល់ពីឥទ្ធិពលនៃសង្រ្គាមឈ្លានពានពីសំណាក់ប្រទេសរុស្ស៊ី។
ក្រុមយក្សរបស់អ៊ុយក្រែនបានមកប៉ះក្រុមនៅឯប្រទេសក្រិក គឺ Olympiacos ដែលគោលដៅសារនេះ មិនផ្អែកលើលទ្ធផលជាធំ តែឈរលើគោលជំហររួម គឺចង់ផ្ញើសំឡេងសន្តិភាព និងពាក្យ “បញ្ឈប់សង្រ្គាម”។ ប្រកួតសេសសល់ផ្សេងទៀត Shakhtar មានគម្រោងចង់លេងប៉ះក្រុមធំៗនៅតាមបណ្តាប្រទេសក្នុងតំបន់អឺរ៉ុប ដើម្បីបន្តរៃអង្គាសថវិកាឲ្យបានច្រើនតាមដែលអាចធ្វើទៅរួច។
លទ្ធផលក្រោយចប់ប្រកួតយប់មិញ ខាង Olympiacos បានទទួលជ័យជម្នះ ក្រោមលទ្ធផល ១-០ តែយ៉ាងណានាយកជាន់ខ្ពស់ប្រចាំក្លឹប លោក Christian Karembeu បានលើកឡើង៖ “យើងពិតជាមានមោទនភាពក្នុងការធ្វើជាម្ចាស់ផ្ទះសារនេះ ដើម្បីលើកកម្ពស់ការយល់ដឹងអំពីគុណវិបត្តិនៃសង្រ្គាម រួចយើងប្រើប្រាស់បាល់ទាត់ជាមធ្យោបាយក្នុងការសាយភាយនូវសន្តិភាព”៕
ប្រភព៖ Goal