ឆ្លងកាត់រយៈពេលជាង ៥ ខែ អ្នកចាត់ការលោក Xavi Hernandez ហាក់បានផ្លាស់ប្តូរក្លឹប Barcelona ដែលសឹងតែធ្លាក់ដល់ចំណុចសូន្យ ឲ្យឡើងមកជោគជ័យជាថ្មី ជាពិសេសគឺនៅលីគកំពូលអេស្ប៉ាញ La Liga។ គិតត្រឹមជុំទី ២៩ អ្នកមានបុណ្យឈរលេខ ៣ មាន ៥៧ ពិន្ទុ នៅចាញ់ Sevilla តែ ៣ ពិន្ទុ ដែលពួកគេនាំមុខមុនពីរជុំ។
បើតាមសារព័ត៌មាន Diario Sport បានទម្លាយនូវកម្រងសំណួរចាក់ដោត ២ ដែលអ្នកចាត់ការសញ្ជាតិអេស្ប៉ាញ បានសួរនាំទៅកាន់សមាជិកក្នុងក្រុមទាំងអស់ គ្រាលោកចូលមកដឹកនាំថ្មីថ្មោង។ ទី ១) តើអ្នករាល់គ្នាប្តូរផ្តាច់នឹងរត់ទៅមុខរហូតសម្រាប់ក្រុមដែរឬទេ? ២) តើអ្នករាល់គ្នា នឹងនៅតែមានចិត្តចូលលេងនាមជាកីឡាករបម្រុងដែរឬទេ នៅនាទី ៩២ លើទីលាន? សំណួរនេះ វាបង្កប់ន័យធំធេងណាស់ ព្រោះអី Xavi ចង់ឲ្យកីឡាករមានឆន្ទៈក្នុងការលះបង់ដើម្បីក្រុម ក៏ដូចជាចេះគោរពវិន័យឲ្យបានល្អ។
លោកធ្លាប់ជាបុគ្គលជោគជ័យមួយកាលនៅជាកីឡាករ ដូច្នេះលោកយល់ច្បាស់អំពីទម្លាប់ល្អ អំពីរបៀបនៃការលះបង់សម្រាប់ក្រុម។ ជាមួយសុពលភាពកុងត្រារបស់គ្រូវ័យ ៤២ ឆ្នាំ គឺសេសសល់ដល់ចុងខែមិថុនា ឆ្នាំ ២០២៤ ឯណោះ សម្រាប់ប្រកួតបន្ទាប់ Barcelona នឹងត្រូវកំណត់ជួប Levante នៅវេលាម៉ោង ០២:០០ នាទីទាបភ្លឺ ឈានចូលថ្ងៃចន្ទ ទី ១១ មេសា៕
ប្រភព៖ Diario Sport