ព្រឹត្តិការណ៍ FIFA World Cup ដែលកំណត់ធ្វើឡើងរៀងរាល់ ៤ ឆ្នាំម្តង រមែងកំណត់យកកាលបរិច្ឆេទចន្លោះខែមិថុនា ឬកក្កដា នៅរដូវក្តៅ ប៉ុន្តែសារនេះ គឺប្លែក ដោយប្តូរមកប្រកួតនៅរដូវរងាវិញ កំឡុងខែវិច្ឆិកានិងធ្នូ ដែលមានប្រទេសកាតារធ្វើជាម្ចាស់ផ្ទះ។
ហេតុផលនៅពីក្រោយនោះ គឺសាមញ្ញ ក៏ដោយសារកាតារ ជាប្រទេសដែលមានសីតុណ្ហភាពខ្ពស់ ហើយជាទូទៅកំឡុងពាក់កណ្តាលឆ្នាំ គឺចំពេលឡើងកម្តៅខ្លាំង ដល់ជាង ៤០ អង្សាសេ។ នេះទោះលើកមកលេងនៅរដូវរងា ក៏នៅតែរាប់ថាក្តៅដែរ សម្រាប់ប្រជាជននៅតំបន់អឺរ៉ុប និងអាមេរិកឡាទីន ព្រោះជាមធ្យមក៏សីតុណ្ហភាព ចន្លោះពី ២៣ ទៅ ២៥ អង្សាសេ។
ដើម្បីដោះស្រាយបញ្ហា ក៏ដូចជាប្រឆាំងនឹងសីតុណ្ហភាពខ្ពស់ ដែលនាំឲ្យប៉ះពាល់ដល់កីឡាករ និងអ្នកទស្សនាក្នុងកីឡដ្ឋាន គណៈរៀបចំកម្មវិធីប្រចាំប្រទេសកាតារ ក៏សម្រេចរៀបចំបំពាក់ឡើងនូវម៉ាស៊ីនត្រជាក់ខ្នាតយក្ស ទៅក្នុងកីឡដ្ឋានទាំង ៨ នៅផែនការណ៍កញ្ចប់ចំណាយរួមប្រមាណ ២២០ ពាន់លានដុល្លារ។
ក៏មានការចែកចាយនូវរូបភាពប៉ុន្មានសន្លឹក ដែលផ្ទុះការចាប់អារម្មណ៍កាលពីប៉ុន្មានថ្ងៃមុន ហើយមើលមួយភ្លែតស្មានតែកាណុងកាំភ្លើងធំ តាមការពិតគឺជាប្រព័ន្ធម៉ាស៊ីនត្រជាក់ដ៏ទំនើបរបស់ប្រទេសកាតារសោះ។ កុំរង់ចាំយូរទំព័រ CTS Sports សូមធ្វើការសង្ខេបនិងពន្យល់ត្រួសៗអំពីប្រព័ន្ធដំណើរការរបស់វាដូចតទៅ៖
បច្ចេកវិទ្យា Cooling Technology នៃម៉ាស៊ីនត្រជាក់ដែលកំពុងរៀបចំដាក់ទៅក្នុងកីឡដ្ឋានទាំង ៨ គឺដំណើរការដោយការប្រើប្រាស់ថាមពលពន្លឺព្រះអាទិត្យ ឬយើងស្គាល់ Solar Energy។ ការអភិវឌ្ឍបច្ចេកវិទ្យានេះ គឺឆ្លងកាត់ការដឹកនាំយ៉ាងល្អិតល្អន់ចេញពីសាស្ត្រាចារ្យបណ្ឌិតនៃមហាវិទ្យាល័យវិស្វកម្មរបស់កាតារ គឺលោក Saud Abdulaziz Abdul Ghani ឬត្រូវបានគេដាក់រហស្សនាមជា “Dr Cool”។
ប្រាប់គេហទំព័រ FIFA.com កាលពីពេលកន្លងទៅ លោក Ghani ពន្យល់៖ “យើងមិនត្រឹមតែឈរលើគោលដៅនាំខ្យល់ត្រជាក់ចូលមកក្នុងកីឡដ្ឋានទេ លើសពីនេះ យើងក៏នឹងបន្សុទ្ធឲ្យខ្យល់នោះ ក្លាយជាខ្យល់បរិសុទ្ធ ដែលបង្កើតផាសុកភាពសម្រាប់មនុស្សទាំងអស់ក្នុងកីឡដ្ឋាន ឬសូម្បីតែអ្នកដែលអាឡែស៊ីនឹងខ្យល់បរិយាកាស”។
ជុំវិញដំណើរការនៃ Cooling Technology របស់កាតារ យើងសង្ខេប ៥ ចំណុចដូចខាងក្រោម៖
១) វាបឺតយកខ្យល់ក្តៅពីខាងក្រៅកីឡដ្ឋាន មកបម្លែងជាខ្យល់ត្រជាក់ តាមរយៈការកង្ហារម៉ាស៊ីនត្រជាក់ ដែលរត់ដោយថាមពលពន្លឺព្រះអាទិត្យ
២) ខ្យល់ត្រជាក់ទាំងអស់ នឹងបំភាយទៅក្នុងកីឡដ្ឋាន តាមរយៈតម្រងដែលគេបំពាក់នៅក្បែរកន្លែងអង្គុយរបស់អ្នកទស្សនា និងក្បាលម៉ាស៊ីនធំនៅលើទីលាន
៣) នេះវានឹងប្រើប្រាស់បច្ចេកទេសចរាចរខ្យល់ ដើម្បីទាញយកខ្យល់ត្រលប់មកវិញ
៤) ខ្យល់ដែលបានទាញត្រលប់មកវិញ នឹងត្រូវបានយកទៅបន្សុទ្ធឲ្យស្អាត និងត្រជាក់ឡើងវិញ
៥) ក្រោយមក ទើបបំភាយខ្យល់ដែលបន្សុទ្ធរួច ចេញទៅក្នុងបរិវេណកីឡដ្ឋានម្តងទៀត
មិនមានការបញ្ជាក់ច្បាស់នោះទេ អំពីទំហំចំណាយលើការបំពាក់នូវម៉ាស៊ីនត្រជាក់ខ្នាតយក្សទាំងអស់ ក៏ប៉ុន្តែត្រឹមដឹងថា វាបានស្ថិតនៅក្នុងចំណោមខ្ទង់ចំណាយល្បាក់ ២២០ ពាន់លានដុល្លារ ជាទំហំចំណាយខ្ពស់បំផុត សម្រាប់រៀបចំ World Cup ខណៈពីមុនមក ធ្លាប់តែមានប្រទេសប្រេស៊ីលចាយអស់ ១៥ ពាន់លានដុល្លារ និងរុស្ស៊ីអស់ត្រឹម ១១,៦ ពាន់លានដុល្លារ៕
ប្រភព៖ បរទេស | ប្រែសម្រួល៖ ក្នុងស្រុក