ខ្សែប្រយុទ្ធនៃក្លឹប AS Roma កីឡាករ Tammy Abraham ដែលបានជាប់ឈ្មោះជាកីឡាករមានតម្លៃផ្ទេរខ្ពស់បំផុតលំដាប់ទី ២ គឺ ៣៦ លានផោន បានកោតសរសើរមិនដាច់ពីមាត់ និងលើកហេតុផលដែលថា លោក Jose Mourinho គឺជាអ្នកចាត់ការល្អបំផុតក្នុងលោក។ បញ្ជាក់អ្នកទាំងពីរធ្លាប់សហការគ្នាម្តងរួចមកហើយ កំឡុងពេលឈរជើងឲ្យក្លឹប Chelsea នាមជាគ្រូសិស្ស។
បុរសវ័យ ២៤ ឆ្នាំដែលកំពុងរីករាយនឹងការលេងឲ្យក្លឹបអ៊ីតាលី គេរកបាន ២៣ គ្រាប់និង Assist ៤ លើក នៅការបង្ហាញខ្លួន ៤១ ប្រកួត។ គេលើកឡើងថា Mourinho ជាមនុស្សដែលយល់ច្បាស់ពីកីឡាករ ហើយតែងតែរិះរកគ្រប់វិធីឲ្យកីឡាករខិតខំទៅមុខជានិច្ច បើទោះបីស្ថិតនៅកម្រិតល្អហើយក៏ដោយ។
Abraham ប្រាប់ទៅ talkSPORT បែបនេះ៖ “ហេតុផលខ្ញុំហៅគាត់ជាអ្នកចាត់ការល្អបំផុតក្នុងលោក ព្រោះគាត់ដឹងពីរបៀបដឹកនាំអ្នក គាត់មានវិធីធ្វើឲ្យអ្នកមើលទៅខ្លួនឯងប្រៀបដូចកីឡាករពិសេសមួយ គាត់តែងតែជំរុញខ្ញុំ ឲ្យព្យាយាមធ្វើឲ្យបានល្អបំផុត ដ្បិតពេលខ្លះខ្ញុំទទួលអារម្មណ៍ថាគ្រប់គ្រាន់ហើយសម្រាប់ខ្លួនឯង ក៏ប៉ុន្តែគាត់ប្រាប់ខ្ញុំឲ្យខំបន្តទៀត”។
លោកបន្ត៖ “កាលនៅ Chelsea ខ្ញុំដូចជាក្មេងម្នាក់ មានអារម្មណ៍ថាតែងតែពិបាកណាស់ពេលហ្វឹកហាត់ក្រោមការដឹកនាំរបស់គាត់ តែក្រោយមកទើបខ្ញុំដឹង ថារបៀបហ្នឹងហើយ ធ្វើឲ្យខ្ញុំរីកចម្រើនឡើង រួចមកដល់ទីនេះ ក៏កាន់តែធ្វើឲ្យខ្ញុំមានទំនុកចិត្តបន្ថែម ពេលដឹងថាមាន Mourinho ជាអ្នកចាត់ការ”៕
ប្រភព៖ talkSPORT