ក្លឹបអ៊ីតាលី Inter Milan ត្រូវបានគេរាយការណ៍ថា បានដាក់តម្លៃជាកំហិតមួយសម្រាប់ខ្សែប្រយុទ្ធវ័យក្មេង Lautaro Martinez ក្រោយលេចលឺថាមានក្លឹបយក្សជាច្រើននៅទូទាំងតំបន់អឺរ៉ុប ចាប់អារម្មណ៍ចង់នាំយកគេ ទៅចូលរួម នៅទីផ្សារដោះដូររដូវក្តៅខាងមុខ។
នោះគឺ ខាងក្លឹបអាណាព្យាបាលដាក់តម្លៃខ្លួនកីឡាករវ័យ ២៤ ឆ្នាំនៅតម្លៃ ៨០ លានអឺរ៉ូ ឬ ៦៧ លានផោនជាកំហិត ទើបព្រមអនុញ្ញាតឲ្យគេចាកចេញទៅកាន់ទ្រនំថ្មី។ នេះជួនពេលដែលសុពលភាពកុងត្រារបស់កីឡាករអាហ្សង់ទីនសេសសល់ដល់ចុងខែមិថុនា ឆ្នាំ ២០២៦ ជាមួយក្លឹបម្ចាស់ដី San Siro។
យើងឃើញថា រដូវកាលនេះ Martinez នៅតែរាប់បានជាចំណែកសំខាន់របស់ក្រុមដឹកនាំដោយលោក Simone Inzaghi ដោយបង្ហាញខ្លួន ៣៩ ប្រកួត រកបាន ១៦ ក្រាប់និង Assist ២ លើក។ និយាយអំពីក្លឹបដែលចង់បាន Martinez រួមមានក្លឹប Tottenham Hotspur, Arsenal និង Man Utd ជាដើម។ នេះបើតាមសារព័ត៌មាន Calciomercato បានចុះផ្សាយ៕
ប្រភព៖ Calciomercato