ម្ចាស់ក្លឹប Inter Miami លោក David Beckham បានមានគម្រោងចង់ប្រមែប្រមូលកីឡាករចាស់ថ្មីរបស់ Barcelona មកជួបជុំគ្នាម្តងទៀត នៅទ្រនំក្នុងទឹកដីសហរដ្ឋអាមេរិក។ ផែនការណ៍សារនេះ ប្រសិនជាជោគជ័យ នោះក្លឹប Miami នឹងក្លាយជាក្លឹបដ៏លេចធ្លោមួយ ប្រចាំលីគកំពូល Major League Soccer ជាមិនខាន។
បើតាមសារព័ត៌មាន Football Espana ចុះផ្សាយថា អតីតកីឡាករជម្រើសជាតិអង់គ្លេស ដែលជាម្ចាស់ក្លឹបបច្ចុប្បន្ន បានសម្លឹងឃើញ Lionel Messi ជាគោលដៅអាទិភាព ហើយជឿថា ក្រោយចប់ World Cup 2022 ក៏អាចនឹងក្លាយជាពេលវេលាសមស្របមួយ សម្រាប់ចរចានាំយកកីឡាករអាហ្សង់ទីនមកកាន់ទឹកដីសហរដ្ឋអាមេរិក។
ទន្ទឹមនោះ ក៏សម្លឹងឃើញ Luis Suarez ដែលពេលចុងក្រោយ គេមិនរីករាយនឹងការឈរជើងជាមួយក្លឹប Atletico Madrid ឡើយ។ Beckham ជឿថា ពេលវេលាការឈរជើងឲ្យក្លឹបនៅតំបន់អឺរ៉ុប សម្រាប់កីឡាករអ៊ុយរុយហ្គាយ ប្រហែលឈានមកដល់ទីបញ្ចប់ហើយ។
អ្នកផ្សេងទៀត មានខ្សែការពារ Jordi Alba និងខ្សែបម្រើ Sergio Busquets ដែលសព្វថ្ងៃនៅឈរជើងឲ្យក្លឹប Barcelona ក៏ប៉ុន្តែមានចចាមអារ៉ាមអាចនឹងចាកចេញ ក្រោយកត្តាអាយុក៏កាន់តែចំណាស់។ តាមប្រភពបានឲ្យដឹងថា Beckham ចង់សម្រេចនាំយកអ្នកទាំង ៤ ឲ្យបានមុនការចាប់ផ្តើមរដូវកាល ២០២៣/២៤៕
ប្រភព៖ Football Espana