ការប្រកួត Champions League វគ្គ ៨ ក្រុមចុងក្រោយ ក៏កៀកនឹងឈានចូលមកដល់នៅពេលខាងមុខ ហើយក្នុងចំណោមនោះ គឺមានគូពិសេស រវាង Chelsea ប៉ះ Real Madrid ដែលកំណត់លេងនៅវេលាម៉ោង ០២:០០ នាទីទាបភ្លឺ ថ្ងៃទី ៧ និង ១៣ មេសា មានផ្សាយផ្ទាល់លើទំព័រ CTS Sports។ នេះរាប់បានជាគូសងសឹក ព្រោះអីរដូវកាលចាស់ ធ្លាប់ប៉ះគ្នាម្ដងហើយ ដោយស្ដេចស រងបរាជ័យក្រោមថ្វីជើងតោខៀវ នាវគ្គពាក់កណ្ដាលផ្ដាច់ព្រ័ត្រ។
ដោយឡែកងាកមករដូវកាលនេះ ដ្បិត Real Madrid ទើបតែសម្ញែងសាច់ដុំ ទម្លាក់ក្រុមខ្លាំង PSG ក៏នៅតែមានការទស្សន៍ទាយជាមុន ពីជើងចាស់ ២ រូប បែរថា Chelsea ឯណោះទេ ដែលនឹងក្លាយជាក្រុមឈ្នះ ហើយឈោងបានកៅអីឆ្ពោះទៅវគ្គបន្ទាប់ ៤ ក្រុមចុងក្រោយ Champions League។
ម្ចាស់ជើងឯក World Cup ជំនាន់ឆ្នាំ ១៩៩៨ របស់បារាំង គឺលោក Emmanuel Petit និង Frank Leboeuf បានជឿជាក់ស្រដៀងគ្នា ថាក្រុមដឹកនាំដោយលោក Thomas Tuchel នឹងអាចបំបាក់ក្រុមលោក Carlo Ancelotti ឲ្យហាលអាវត្រឹមវគ្គនេះ។
លោក Leboeuf និយាយ៖ “ខ្ញុំគិតថា Chelsea គឺជាក្រុមល្អជាង Real Madrid នេះប្រហែលអ្នកគាំទ្រខ្លះ មិនរីករាយនឹងការដែលខ្ញុំនិយាយបែបនេះទេ ប្រហែលពួកគេគិតថាខ្ញុំជាអ្នកគាំទ្រ PSG ទើបបន្ទាប Real តែអ្នកកុំភ្លេចឲ្យសោះ អតីតកាលខ្ញុំធ្លាប់ជាប្រធានក្រុម Marseille [ក្លឹបគូប្រជែងរបស់ PSG]”។
លោកបន្ថែមថា៖ “រួចបើយើងមើលទៅប្រកួតទល់ Barcelona ថ្ងៃមុន លទ្ធផល ៤-០ គឺពិតជាធ្វើឲ្យខ្ញុំភ្ញាក់ផ្អើល ទាំងអស់នេះហើយ ជាមូលហេតុដែលនាំឲ្យខ្ញុំជឿជាក់ទៅលើ Chelsea ជាជាង Real Madrid”។
រីឯមតិរបស់លោក Petit បានបញ្ជាក់ថា៖ “ជាការពិត Chelsea គឺនឹងអាចទម្លាក់ Real Madrid ព្រោះបើយើងមើលទៅប្រកួត El Clasico ថ្ងៃមុន ហើយជាពិសេសកាលទល់ PSG ក៏ខ្ញុំនៅទស្សនាដោយផ្ទាល់ សឹងតែថាទាំងពីរជើងនោះ គឺ PSG ល្អជាង ហើយគួរតែរកបាន យ៉ាងហោច ៥ ឬ ៦ គ្រាប់”។
លោកបន្ថែម៖ “រួច Chelsea គឺមានកីឡាករល្អច្រើនណាស់ ដែលនឹងអាចបង្កការឈឺចាប់ដល់ Real Madrid ខ្ញុំដឹងថា ក្លឹបអធិរាជស ពួកគេមានប្រវត្តិសាស្ត្រជោគជ័យខ្លាំងនៅពានរង្វាន់នេះ តែខ្ញុំច្បាស់ថា Chelsea គឺល្អជាង ពួកគេនឹងអាចឆ្លងទៅវគ្គបន្ទាប់”។
គួរបញ្ជាក់ដែរថា ស្ថិតិប៉ះគ្នារវាង Chelsea-Real Madrid គឺធ្លាប់កើតឡើងតែ ៥ លើកគត់ ដោយតោខៀវ ឈ្នះ ៣ ស្មើ ២ ដែលមានន័យថា អធិរាជស មិនទាន់ស្គាល់រសជាតិឈ្នះសូម្បីតែមួយ។ កាលពីរដូវកាលមុន នៅជើងទី ១ ក្នុងទឹកដី Real គឺស្មើ ១-១ ហើយបកមកជើងទី ២ នៅទឹកដី Chelsea ម្ចាស់ផ្ទះយកឈ្នះ ២-០។ ចុះសម្រាប់មតិគ្នាយើងវិញ ជឿថា ជា Chelsea ឬក៏ Real Madrid ដែលនឹងត្រូវហាលអាវត្រឹមវគ្គនេះ?
ប្រភព៖ បរទេស