នៅសល់តែរយៈពេលជិត ២ ខែទៀតប៉ុណ្ណោះ រដូវកាលនៅ Premier League នឹងត្រូវបានបញ្ចប់ ហើយឆ្លងតែប៉ុន្មានសប្តាហ៍បន្ទាប់ ក៏ទីផ្សារដោះដូររដូវក្តៅឈានចូលមកដល់។ ងាកទៅមើល Man Utd គឺជាក្លឹបដែលស្ថិតក្នុងចចាមអារ៉ាមច្រើនជាងគេ មិនថាតែការលក់ចេញ និងទិញចូលកីឡាករនៅពេលខាងមុខ។
មួយក្នុងចំណោមនោះ ក្រុមដឹកនាំដោយលោក Ralf Rangnick ក៏លេចលឺថា ចាប់អារម្មណ៍ចង់បានខ្សែបម្រើរបស់ក្លឹបញញួរធំ West Ham United គឺកីឡាករ Declan Rice។ បើតាមសារព័ត៌មាន Daily Mail ចុះផ្សាយថា ភាគីក្លឹបអាណាព្យាបាល ក៏បានដាក់តម្លៃខ្លួនរបស់ Rice មកហើយដែរ ដោយទាមទារយ៉ាងហោចណាស់ ១៥០ លានផោនជាកំហិត ទើបព្រមអនុញ្ញាតឲ្យគេចេញ។
នេះរាប់បានជាតម្លៃដ៏ក្រាស់ក្រែលមួយ ឬហៅបានថា តម្លៃដាក់បិទផ្លូវមិនចង់ឲ្យកីឡាករចាកចេញតែម្តង ដ្បិតអីសុពលភាពកុងត្រា សេសសល់ត្រឹមចុងខែមិថុនា ឆ្នាំ ២០២៤ ហើយបើតាមហាងឆេងពីអ្នកវិភាគជាច្រើន ប៉ាន់ប្រមាណថាកីឡាករអង់គ្លេសខាងលើ គួរថ្លៃចន្លោះ ៨០ ទៅ ១០០ លានផោនខ្ពស់បំផុត។
បញ្ជាក់ថា Rice ធ្លាប់ជាអតីតយុវជនថ្នាលរបស់ក្លឹបតោខៀវ Chelsea មុនបោះជំហានមកចូលរួមហ្វឹកហាត់បន្ត ជាមួយក្លឹបញញួរធំ West Ham កាលពីរដូវក្តៅ ឆ្នាំ ២០១៣។ រហូតមកដល់ឆ្នាំ ២០១៧ ទើបគេទទួលបានឱកាស មកចូលរួមនៅឈុតធំ ហើយស្ថិតិបង្ហាញខ្លួនសរុប ១៨៣ ប្រកួត រកបាន ៩ គ្រាប់និង Assist ៩ លើក។ ដូច្នេះយើងនឹងរង់ចាំមើល ថាតើក្លឹបម្ចាស់ដី Old Trafford នឹងអាចមានលទ្ធភាពរត់រួច ក្នុងការចំណាយ ១៥០ លានផោន ដើម្បីយក Rice ឬក៏ត្រូវបោះបង់ ហើយបើកផ្លូវឲ្យភាគីក្លឹបដទៃណាមួយ?
ជុំវិញរឿងរ៉ាវចចាមអារ៉ាមនេះដែរ ងាកទៅអតីតកីឡាករនៅ Premier League លោក Gabriel Agbonlahor ក៏បាននិយាយថា ខ្សែបម្រើវ័យ ២៣ ឆ្នាំ នឹងមិនជ្រើសយកការផ្ទេរទៅក្លឹប Man Utd នោះទេ ផ្ទុយទៅវិញ គេនឹងគិតគូរការជ្រើសយកក្លឹបក្រៅតំបន់ គឺអាចជា Real Madrid។
ប្រាប់ talkSPORT លោក Agbonlahor ពន្យល់បែបនេះ៖ “ខ្ញុំមើលទៅក្លឹប Manchester City ឯណោះ ពួកគេមាន Rodri ហើយប្រសិន Fernandinho ចាកចេញ ក៏មាន Rodri នេះមកបំពេញកន្លែងដែរ រួចយើងសម្លឹងទៅ Chelsea បើទោះបីពួកគេចង់បាន ក៏មិនមានឱកាស ឬលទ្ធភាពក្នុងការចាយវាយក្រាស់ក្រែលទៅលើ Rice បើផ្អែកតាមស្ថានភាពក្លឹបនាពេលចុងក្រោយ”។
លោកបន្តទៀតថា៖ “រីឯ Liverpool ពួកគេមាន Fabinho និង Henderson ដូច្នេះក៏គ្មានហេតុផលអ្វី ត្រូវបន្ថែមការនាំចូលអ្នកថ្មី និងចុងក្រោយគឺ Manchester United រាប់បានជាក្លឹបតែមួយគត់ នៅ PL ដែល Rice អាចនឹងគិតគូរ”។
“ក៏ប៉ុន្តែសួរថា តើគេចង់ទៅទីនោះឬអត់? នេះ Rice គេចង់ឈ្នះពានរង្វាន់ គេចង់ចូលរួមលេងនៅ Champions League រួចបើយើងមើល United រដូវកាលបន្ទាប់ ប្រហែលពួកគេមិនអាចធ្វើបានឡើយ ដូច្នេះជម្រើសចុងក្រោយ គឺសម្លឹងទៅក្លឹបដទៃនៅតំបន់អឺរ៉ុប ដោយខ្ញុំគិតថា Real Madrid ពិតជាសក្តិសម ព្រោះអី Toni Kroos និង Luka Modric ក៏ត្រៀមចាកចេញ ដូច្នេះហើយ ១០០ ភាគរយ ខ្ញុំមានការជឿជាក់លើ Rice គេនឹងជ្រើសយក Real Madrid ជាជាងក្លឹប Man Utd”៕
ប្រភព៖ បរទេស