លោក Mikel Arteta ប្រឈមខ្ពស់ អាចនឹងបាត់បង់កីឡាករលេងតំណែងការពារ នៅការលក់ចេញពេញថ្លៃ នាទីផ្សារដោះដូររដូវក្តៅខាងមុខ បន្ទាប់ពីដាក់ឲ្យខ្ចីជើងទៅកាន់ក្លឹបបារាំង Marseille បានមួយរដូវកាល។
នោះគឺ William Saliba ដែលបុរសវ័យ ២០ ឆ្នាំ តាមកិច្ចព្រមព្រៀង គឺត្រូវវិលត្រលប់មកក្លឹបអាណាព្យាបាលវិញ នៅក្រោយបញ្ចប់រដូវកាលខាងមុខ តែយ៉ាងណាគេបានបង្ហើបតម្រុយ ថាហាក់ចង់បន្តនៅ ពោលគឺចង់ឲ្យ Marseille ចរចាទិញផ្តាច់កុងត្រា ចេញពីក្លឹប Arsenal តែម្តង។ ស្ថិតិបង្ហាញខ្លួនរដូវកាលនេះ យុវជនសញ្ជាតិបារាំង ទទួលបានពេលវេលាជាប់លាប់នៅក្លឹបខាងលើ ពោលមាន ៤០ ប្រកួត ស្មើនឹង ៣៥៩៥ នាទីឯណោះ។
តាមការបញ្ជាក់ប្រាប់ RMC Sport កីឡាករ Saliba និយាយ៖ “ខ្ញុំអត់ធ្លាប់លាក់អារម្មណ៍ទេ គឺនៅទីនេះ ពិតជារីករាយ ខ្ញុំអត់ដឹងថា អនាគតទៅមុខនឹងបែបណា ទាំងសេសសល់ត្រឹមរយៈពេល ២ ខែទៀត អ្វីដែលសំខាន់យើងចង់ចាប់យកកៅអីសម្រាប់លេង Champions League ហើយនៅ Conference League បន្តទៅមុខតាមដែលអាចធ្វើទៅបាន”។
យុវជនខាងលើបន្ត៖ “ខ្ញុំនឹងពិភាក្សាអំពីរឿងនេះ នៅចុងខែឧសភា ឬដើមខែមិថុនា រវាងភាគី Arsenal និង Marseille តែយ៉ាងណាការបន្តនៅទីនេះ មិនជាគំនិតអាក្រក់ឡើយ ខ្ញុំស្គាល់ទីក្រុងនេះច្បាស់ ស្គាល់ពីមិត្តរួមក្រុម អ្នកចាត់ការ គ្រាន់ថាគ្រប់យ៉ាងវាមិនស៊ីសងតែលើខ្ញុំបានទេ”៕
ប្រភព៖ RMC Sport