ក្លឹបមាន់ខ្នាយមាស Tottenham Hotspur មិនបង្អង់យូរនោះទេ ដោយប្រញាប់បញ្ជូនក្រុមការងារ ឲ្យទៅចរចាជាមួយភាគីរបស់កីឡាករ Paulo Dybala រួចស្រេច ក្រោយទទួលដំណឹង កីឡាករអាហ្សង់ទីនត្រៀមនឹងចាកចេញ នៅរដូវក្តៅខាងមុខ។ តាមការបញ្ជាក់ពីនាយកប្រតិបត្តិក្លឹប Juventus បង្ហើបច្បាស់ហើយ ថា Dybala មិនស្ថិតក្នុងផែនការណ៍ធំរបស់ក្លឹបតទៅទៀតទេ ជាពិសេសក្រោយការមកដល់របស់ Dusan Vlahovic។
ស្ថានភាពរបស់ខ្សែប្រយុទ្ធកាន់ឆ្នាំ នៅក្លឹបសេះបង្កង់ខាងលើ ក៏មានក្លឹបជាច្រើនតាមក្រវែលមើល ក្រៅពី Spurs នេះសោត ក៏ធ្លាប់មាន Barcelona, Liverpool និង Man Utd ផ្សេងទៀតផងដែរ។ បើតាមសារព័ត៌មាន Fabrizio Romano ចុះផ្សាយថា ពេលនេះ ក្លឹបមាន់ខ្នាយមាស កំពុងពន្លឿនល្បឿននៃការចរចាហើយ ពោលចង់បានគេ ត្រៀមទុកមកជំនួស Harry Kane ផង ប្រសិនណាកីឡាករអង់គ្លេសត្រូវចាកចេញពិតមែន។
តាមដឹង Dybala ក៏នឹងទារថ្លៃពលកម្មក្រាស់ក្រែលមួយដែរ ពីភាគីក្លឹបបន្ទាប់ ដែលគេនឹងព្រមទម្លាក់ចុងប៊ិច ត្រង់ហ្នឹងហើយជាបញ្ហាដែល Juventus មិនអាចប៉ះប៉ូវឲ្យបាន។ ជាមួយការចាយពេល ៧ ឆ្នាំឲ្យក្លឹបនៅអ៊ីតាលី គេរកបាន ១១៣ គ្រាប់និង Assist ៤៨ លើក នៅការបង្ហាញខ្លួន ២៨៣ ប្រកួតសរុប៕
ប្រភព៖ Twitter