Barcelona បានបង្កើតលទ្ធផលដ៏ភ្ញាក់ផ្អើល តាមរយៈការយកឈ្នះទៅលើ Real Madrid ៤-០ នៅឯទឹកដី Santiago Bernabeu កាលពីចុងសប្តាហ៍មុន ហើយនេះកំពុងធ្វើឲ្យអ្នកគាំទ្រមានការសាទរជាខ្លាំង ព្រោះគ្រប់គ្នាមិនរំពឹងថា លទ្ធផលអាចកើតឡើងដល់បែបហ្នឹងទេ។
ក្រោមការដឹកនាំរបស់លោក Xavi Hernandez ក៏បានកែប្រែស្ថានការណ៍ពីការធ្លាក់ចុះសឹងតែដល់បាត មកក្លាយជាក្រុមកំពូលប្រចាំលីគអេស្ប៉ាញសារជាថ្មី ដល់ថ្នាក់យកឈ្នះទាំងកំពូលក្រុម ដូចជាអធិរាជសបានថែមទៀត។
ងាកទៅមើល Shakira ជាតារាចម្រៀងស្រីល្បីឈ្មោះ និងជាភរិយារបស់ខ្សែការពារ Gerard Pique នៃក្លឹប Barcelona ក៏បានលាន់មាត់សរសើរមិនដាច់ពីមាត់ ក្រោយស្វាមីខ្លួនចូលរួមចំណែកយ៉ាងសំខាន់នៅជ័យជម្នះកន្លងទៅនេះ។
ស្រ្តីជនជាតិកូឡុំប៊ី និយាយ៖ “Gerard [Pique] គាត់អត់ឲ្យខ្ញុំនិយាយរឿងហ្នឹងជាសាធារណៈទេ តែជាការពិត គាត់គឺជាវីរបុរស គាត់លេងសារនេះ គាត់លេងទាំងខ្លួនឯងរបួស ទាំងឈឺចាប់ ហើយតែងតែផ្តល់ភាពល្អបំផុតដល់ក្រុម នេះមិនមែនដោយសារគាត់ជាប្តីខ្ញុំទេ តែខ្ញុំត្រូវតែនិយាយ គាត់សក្តិសមជាខ្សែការពារកណ្តាលដ៏ល្អដាច់គេក្នុងលោក”៕
ប្រភព៖ Football-Espana