ក្រុមជម្រើសជាតិដាណឺម៉ាក បានកោះហៅខ្សែបម្រើ Christian Eriksen ឱ្យចូលជម្រើសជាតិវិញហើយ ក្រោយពីរូបគេមានបញ្ហាបេះដូងតាំងពីព្រឹត្តិការណ៍ Euro 2020 មក។
កីឡាករវ័យ៣០ឆ្នាំដែលមានបញ្ហាបេះដូងរហូតដល់ដួលសន្លប់នោះ ត្រូវបានព្យាបាលជាសះស្បើយ និងបានចូលលេងបាល់ទាត់វិញហើយ។ បច្ចុប្បន្នរូបគេលេងឱ្យក្រុម Brentford ហើយក៏ឃើញថាធ្វើបានល្អកាលពីប្រកួតកន្លងទៅផងដែរ។ ដោយសារតែមើលឃើញថាស្ថានភាពរបស់អតីតកីឡាករ Spurs បានត្រលប់មកល្អដូចដើមហើយ ទើបពេលនេះជម្រើសជាតិដាណឺម៉ាកក៏កោះហៅគេមកលេងឱ្យជម្រើសជាតិវិញ។
Eriksen នឹងចូលរួមជាមួយក្រុមជម្រើសជាតិ ហើយចាប់ផ្ដើមហ្វឹកហាត់នៅអេស្ប៉ាញដើម្បីប្រកួតអន្ដរជាតិ២ប្រកួតនាពេលខាងមុខនេះ។ ដាណឺម៉ាក ក៏ជាក្រុមទទួលបានកៅអីលេង World Cup 2022 នៅប្រទេសកាតាផងដែរ៕ ប្រភព៖ BBC